Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 192 Hüküm no: 194 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bostan Efendi b. el-Hâc Mehmed’e vakfa ait evi tamir için izin verildiği Mahmiye-i Kostantıniyye’de Âşık Paşa mahallesi sükkânından olan işbu hâfızu’l-kitâb zahrü’l-kuzât mevlânâ Bostân Efendi b. el-Hâc Mehmed meclis-i şer‘-i hatîre gelip takrîr-i kelâm edip, merhûme Aişe Hâtun nâm sâhibetü’l-hayrın vakfından mahalle-i merkūmede vâki‘ olup bir tarafı Medîne-i Münevvere Vakfı ve bir tarafı Sinan Ağa mülkü ve bir tarafı merhûm el-Hâc Hasan Vakfı ve bir tarafı tarîk-i âm ile mahdûd olup, süknâsı ulemâya meşrûta olmakla bundan akdem savb-ı şer‘den bana tevcîh olunan menzilde hasbemâ şarateti’l-vâkıfe sâkin iken bi irâdeti’llâhi te‘âlâ muhterik olmakla menzil-i merkūmu vakf-ı mersûmun savb-ı şer‘den nasb ve ta‘yîn olunan mütevellîsi Veli Bey b. Mustafa nâm kimesne ma‘rifetiyle mâlımdan müceddeden binâ ve imâret etmek için kıbel-i şer‘den izin verilmek taleb ederim dedikde, mûmâ[-ileyh] Bostan Efendi[’ye] menzil-i merkūmu vech-i meşrûh üzre mâlıyla binâ ve imâret etmek için savb-ı şer‘den izin verilmeğin, mâ vaka‘a bi’t-taleb ketb olundu. Tahrîren fî evâ’ili şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Ali Efendi b. Üveys el-kadı, Şeyh Sinan Efendi, Umdetü’l-müderrisîn Mehmed Efendi el-Halebî, Hasan Bey b. Mustafa el-Cündî.