Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 192 Hüküm no: 195 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Paşa’nın vârislerinin ölen miras bırakanlarının peşin olarak tahsil ettiği has gelirleri konusunda mültezimle anlaştıkları Mahmiye-i Kostantıniyye’de Mahmud Paşa Câmi‘i mahallesinde sâkin olup yeniçeri tâifesinden olan Ahmed b. Hızır nâm kimesne meclis-i şer‘de, bundan akdem Rumeli beylerbeyisi iken medîne-i Sofya’da müteveffâ olan merhûm Hüseyin Paşa’nın sulbî oğulları Ahmed ve İbrahim ve Halil ve Hasan ve Mustafa ve İsmail nâm sagīrlerin ve sulbiye kızı Hümaşah nâm sagīrenin vasîyy-i muhtârları olan bâ‘isü’l-kitâb Osman Ağa b. Behrâm nâm kimesne mahzarında bi tav‘ihî ikrâr ve takrîr-i kelâm edip, bundan akdem müteveffâ-yı müşârunileyhin mutasarrıf olduğu hâslardan Berkofça hâssını bir sene tamâmına değin mûmâ-ileyhden ber vech-i maktû‘ iltizâm edip, ber vech-i peşîn tarîki ile mâlımdan otuz bin akçe teslîm edip bir iki ay mikdârı ancak zabt ve tasarruf etmiş iken mûmâ-ileyh Hüseyin Paşa müteveffâ olup mutasarrıf olduğu hâsların cümlesi taraf-ı mîrîden âhara tevcîh olunmakla, müteveffâ-yı mûmâ-ileyhe ber vech-i peşîn teslîm eylediğim otuz bin akçeyi terekesinden taleb eylediğimde, mezbûr Osman Ağa bi’l-vesâye inkâr edip, ben dahi isbât sadedinde olup münâza‘ât-ı kesîre vukū‘undan sonra tavassut-ı muslihîn ile on bir bin akçeye sulh eylediklerinde, sulh-ı mezbûr her vechile sıgār hakkında nâfi‘ olmağın ben dahi sulh-ı mezbûru kabûl ve bedel-i sulh-ı merkūm olan on bir bin akçeyi terekesinden vasîyy-i merkūmun yedinden alıp kabz edip, mâ‘adâsı olan on dokuz bin akçeden müteveffâ-yı mûmâ-ileyhin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde, merkūm Ahmed Beşe’yi kelimât-ı meşrûhasında merkūm Osman Ağa dahi bi’l-vesâye tahkīk ve akd-i sulh-ı mezbûru tasdîk edicek, mâ vaka‘a bi’t-taleb ketb olundu. Tahrîren fi[’l-yevmi’t-] tâsi‘ [min şehri] Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Yusuf Bey b. Şaban, Sinan b. Abdullah, Piyâle Çavuş b. Abdullah, Mansur b. Hamza.