Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 193 Hüküm no: 196 Orijinal metin no: [37a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Cafer’in annesi Aişe Hatun bt. Şeyh Mehmed’e ev hibe ettiği Mahrûse-i İstanbul’da Sancakdâr Hayreddin mahallesi sâkinelerinden fahrü’l-muhadderât Fâtıma Hâtun bt. Cafer Ağa meclis-i şer‘-i hatîr-i lâzımü’t-tevkīrde, vâlidesi işbu hâfızatü’l-kitâb zahrü’l-muvakkarât Aişe Hâtun bt. eş-Şeyh Mehmed Efendi mahzarında bi’t-tav‘i’s-sâf ikrâr ve i‘tirâf edip, bundan akdem babamız müşârunileyh Cafer Ağa hâl-i sıgārımızda bin otuz senesi Cumâdelâhire’sinin on altıncı gününde bana hibe-i sahîha-i şer‘iyye ile hibe etmekle hâlâ silk-i mülkümde münselik mahalle-i mezbûrede vâki‘ tarafeyni Saka Hızır Vakfı’na ve bir tarafı mahalle-i mezbûre mescidi müezzinine mevkūf menzile ve bir tarafı tarîk-i âma müntehî olup, iki bâb fevkānî evleri ve orta sofasını ve yan sofasını ve kileri ve iki beyt-i süflîyi ve zât-ı eşcâr-ı müsmire ve gayr-ı müsmire hadîkayı ve su kuyusunu ve kenîfi ve muhavvatayı müştemil olan menzilimi, ba‘de’t-tahliyeti’ş-şer‘iyyeti’l-mu‘tebere vâlidem müşârunileyh Aişe Hâtun’a hibe-i sahîha-i şer‘iyye ile hibe ve teslîm edip, ol dahi meclis-i hibede kabz [ve] ittihâb ve tesellüm eyledi. Ba‘de’l-yevm menzil-i mahdûd-ı mezkûr mülk-i mevhûbudur keyfe mâ teşâ ve tahtâr mutasarrıfe olsun dedikde, mukırra-i mesfûrenin minvâl-i meşrûh üzre cârî ve sâdır olan ikrârını müşârunileyhâ Aişe Hâtun vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. [Tahrîren] fi’l-yevmi’l-âşir min şehri Rebî‘ilâhir li sene selâsin ve erba‘în ve elf. Şuhûdü’l-hâl: Umdetü’l-meşâyihi’l-kirâm eş-Şeyh Mehmed Efendi b. Hamza, Umdetü’l-kuzât Mustafa Efendi b. eş-Şeyh Mehmed Efendi el-müşârunileyh, Umdetü’l-mehâdîmi’l-kirâm Mahmud Çelebi b. Mehmed Efendi el-müşârunileyh, Fahrü’l-kuzât Ahmed Efendi b. eş-Şeyh Mehmed Efendi el-mûmâ-ileyh, Cafer Ağa b. Mustafa, Mustafa Çelebi b. Mehmed, Hasan Halîfe b. Mustafa el-Müezzin.