Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 194 Hüküm no: 197 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülaziz Efendi b. Hüsameddin Efendi’nin terekesinden vakıf alacaklarının tahsil edildiği Sâbıkan ( ) kadısı olan umdetü’l-ulemâ’i’l-izâm kıdvetü’l-fuzalâ’i’l-fihâm sâhibü’l-me‘âlî ve’l-me’âsir hâvi’l-mehâmid ve’l-mefâhir Abdülaziz Efendi b. el-müvellâ el-merhûm el-mebrûr ed-dâricü ilâ medârici rahmeti rabbihi’l-mağfûr Hüsameddin Efendi eş-şehîr beyne’l-ulemâi’s-sâde bi Karaçelebizâde meclis-i şerî‘at-i şerîfede, bundan akdem Rumeli kazaskeri iken bi takdîri Rabbânî ile vedâ‘-ı âlem-i fânî edip gûşe-nişîn ...? dârü’n-ni‘am-ı cinân olan merhûm ve mağfûrun-leh birâder-i emcedleri Karaçelebizâde Mehmed Efendi hazretlerinin necl-i necîl ve selîl-i aslı olup sâbıkan Edirne kadısı olan kıdvetü’l-ulemâi’l-izâm, zübdetü’l-fuzalâi’l-fihâm yenbû‘u’l-fezâ’il ve me‘âlî metbû‘ü’l-efâzıl ve’l-e‘âlî, a‘lemü’l-ilm ve’l-hüdâ, menârü’l-fazli ve’t-tukā Ebu’l-fazl Mahmud Efendi hazretleri mahzarında bi’t-tav‘i’s-sâf ikrâr ve i‘tirâf edip, merhûm-ı müşârunileyh hâl-i hayâtlarında meşrûtiyyet üzre merhûm Rum Mehmed Paşa ve babaları Hüsameddin Efendi ve Sitti Hâtun Evkāfı’na mütevellî olup vefâtından sonra tevliyet-i evkāf-ı mezkûre meşrûtiyyet üzre bana intikāl etmeğin, evkāf-ı mezbûre mâllarından hîn-i vefâtlarında merhûm Mehmed Paşa Vakfı’ndan yedlerinde olan yüz altmış dokuz bin dört yüz on akçeyi ve mâl-ı vakf-ı mezbûrdan Molla Kabil nâm kimesne zimmetinde olan üç bin akçe ve Müstedâm Bey zimmetinde olan on bin akçe ve Çukadâr Mehmed Beşe zimmetinde olan iki bin akçe ve Mustafa Bey zimmetinde olan dört bin akçe ve hâlâ Bacı kadısı olan Abdülaziz Efendi zimmetinde olan beş bin yedi yüz elli akçe ve Musli Çelebi zimmetinde olan üç bin akçe ki, cem‘an yirmi yedi bin yedi yüz elli akçeyi ve merkūme Sitti Hâtun evkāfından yedlerinde hîn-i vefâtlarında mevcûd olan yüz yedi bin dört yüz doksan akçeyi ve hâlâ Dağardı kadısı İsmail Efendi b. eş-Şeyh Ömer Efendi zimmetinde olan dört bin sekiz yüz akçeyi ve Malkaralı Mustafa Efendi zimmetinde asl-ı mâldan olan yetmiş riyâlî guruş ve mu‘âmele-i şer‘iyyeden dokuz yüz akçe ki, hurda akçe hesâbı üzre dokuz bin yüz elli akçe olup ve Babasultan’da sâkin Ali Bey nâm kimesne zimmetinde olan on bir bin akçeyi ve Ankaravî Mehmed Efendi veresesi zimmetinde olan on bir bin yüz elli akçeyi ki, cem‘an otuz altı bin yüz akçe eder zimem-i nâsda olan akçeleri yerli yerinde gösterip, ben dahi kabûl eyledikden sonra hâlâ Mehmed Paşa Vakfı’nda nakid olan yüz altmış dokuz bin dört yüz on akçeyi ve Sitti Hâtun Vakfı’ndan nakid olan yüz yedi bin dört yüz doksan akçeyi ve merhûm Hüsam Efendi Vakfı’ndan nakid olan kırk bin râyic fi’l-vakt akçeyi ba‘zı muhallefât-ı merhûm-ı müşârunileyhe vâzı‘u’l-yed olan mûmâ-ileyh Mahmud Efendi hazretlerinin bu kerîmelerinden bi’t-tamâm ve’l-kemâl ahz u kabz edip, evkāf-ı mezkûr mâlından mezbûr-ı merhûm mûmâ-ileyh muhallefâtından bir akçe ve bir habbe bâkī kalmamışdır dediklerinde, müşârunileyh Abdülaziz Efendi hazretlerinin minvâl-i meşrûh üzre cârî ve sâdır olan ikrârlarında mûmâ-ileyh Mahmud Efendi hazretleri vicâhen tasdîk ve şifâhen tahkīk ettiklerinde, mâ hüve’l-vâki‘ bi’t-taleb ketb olundu. Tahrîren fî evâsıtı Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Umdetü’l-mevâli’l-kirâm Abdurrahman Efendi b. eş-şehîr bi Velizâde, Umdetü’l-mevâli’l-kirâm Mehmed Efendi eş-şehîr bi Sermahfilzâde, Umdetü’l-müderrisîni’l-kirâm Mehmed Esad Efendi, Umdetü’l-emâcid Ömer Ağa b. ( ), Zahrü’l-kuzât Zeynî Efendi, Hasan Çavuş b. Mustafa, Zahrü’l-kuzât Mustafa Efendi eş-şehîr bi Tezkirecizâde, Mustafa Çelebi Şeyhzâde, Osman Çelebi b. Ali, Hasan Bey b. Mustafa, Halil Çelebi b. Mustafa, Küçük Ali Çelebi, Mustafa Çavuş b. Davud, Receb Çavuş b. ( ), el-Hâc Piyâle Bey b. Abdullah, Süleyman Çelebi b. Mehmed, Mehmed b. Muharrem, Ahmed Çavuş b. Hasan Çavuş, Kâtibü’l-hurûf Mehmed Sezâyî.