Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 197 Hüküm no: 200 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâbiha bt. Ahmed’in evini Malkoç Efendi Vakfı’na bey‘ bi’l-istiğlâl yoluyla sattığı Mahmiye-i Kostantıniyye’de Hacı İsâ mahallesinde sâkine olan Sâbiha bt. Ahmed nâm hâtun meclis-i şer‘de, merhûm Malkoç Efendi Vakfı’nın bi’l-fi‘il mütevellîsi olan işbu bâ‘isü’l-kitâb Osman Halîfe b. Mustafa nâm kimesne mahzarında bi tav‘ihâ ikrâr ve takrîr-i kelâm edip, mahalle-i merkūmede vâki‘ olup bir tarafı Mehmed Çelebi b. Hüseyin el-İmâm mülkü ve bir tarafı Mehmed b. Hüseyin mülkü ve bir tarafı Hamamcı Mehmed mülkü ve taraf-ı râbi‘i tarîk-i hâs ile mahdûd bir bâb mülk menzilimi, mütevellî-i merkūm Osman Halîfe’ye bin kırk senesinde yirmi bin akçeye bey‘ ve teslîm eylediğimde, mezbûr dahi vakf-ı merkūm mâlı ile bi tarîki’l-istiğlâl iştirâ ve tesellüm edip, def‘-i semen ve kabz-ı mebî‘den sonra ba‘de’t-tahliyeti’ş-şer‘iyye sene-i merkūme Şa‘bânü’l-mu‘azzamı gurresinden senede üçer bin akçe icâre-i müeccele ile îcâr ve teslîm edip, Galata kazâsında Kasımpaşa kasabasında Kulaksız mahallesi sükkânından Mustafa Bey b. Mehmed nâm kimesne emr ve kabûlü hâviye kefâlet ile derkine ve ücret-i ma‘hûdesine kefîl olup hüccet tahrîr olunmakla, bin kırk iki senesi şehr-i Recebü’l-müreccebi gāyetine değin icâre-i müeccelesini cânib-i vakfa edâ ve teslîm etmekle zimmetimde [38b] yirmi bin akçe asl-ı mâl kalmış iken vakf-ı merkūm mâlından mütevellî-i mersûm yedinden üç bin akçe alıp kabz edip, zimmetimde cem‘an yirmi üç bin akçe deynim oldukdan sonra mütevellî-i merkūm Osman Halîfe menzil-i merkūmu zikri sebk eden bin kırk iki senesi Şa‘bânü’l-mu‘azzamı gurresinde üç bin dört yüz ellişer akçeden üç sene gāyetine değin cem‘an on bin üç yüz elli akçe icâre-i müeccele ile îcâr ve teslîm eyledikde, ben dahi ber nehc-i meşrûh istîcâr ve kabûl eyledim dedikde, mukırra-i merkūme Sâbiha Hâtun’u ikrâr-ı meşrûhunda mütevellî-i merkūm Osman Halîfe dahi bi’l-muvâcehe tasdîk ve minvâl-i muharrer üzre îcâr ve teslîm eylediği tahkīk edicek, mâ vaka‘a bi’t-taleb ketb olundu. Tahrîren fî evâili Rebî‘ilevvel min şuhûri li sene selâsin ve erba‘în ve elf. Şuhûdü’l-hâl: Şeyhî Ahmed Efendi b. Ömer, Yusuf Efendi b. Veli el-İmâm, Burhan Efendi b. İbrahim el-İmâm, İbrahim Efendi b. Bâli el-İmâm, Mustafa Efendi b. Cafer el-İmâm, Mehmed Çelebi b. Hasan el-İmâm, Hasan Efendi b. Hüseyin el-İmâm, el-Hâc Mustafa b. Mahmud el-attâr, Ahmed Dede b. Abdullah el-attâr, Mahmud Halîfe b. Kulu el-Müezzin, el-Hâc Abdülkerim b. Mustafa el-kayyum, Hüseyin b. Ahmed el-muhzır, Yusuf Bey b. Abdullah el-muhzır, Yusuf b. Şaban el-muhzır.