Bab Mahkemesi 54 Numaralı Sicil (H. 1102 / M. 1691) cilt: 20, sayfa: 218 Hüküm no: 247 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Beyazîzâde Ahmed Efendi’nin kocasından intikal eden miras hissesini Hacı Hasan Efendi b. Ali Çelebi’ye satması Fi’l-asl vilâyet-i Rumeli’nde medîne-i Mostar ahâlîsinden olup, mahrûse-i Haleb-i şehbâ kadısı iken düyûnu terekesinden ezyed olduğu hâlde vefât eden merhûm Mahmud Efendi b. Halil b. Ferhad’ın verâseti, zevce-i menkûhası zahrü’l-muhadderât Fâtıma Hâtun bt. el-mevlâ el-merhûm el-mebrûr ed-dâricü ilâ medâric -rahmetü rabbihi’l-gafûr- Beyâzîzâde Ahmed Efendi ile evlâd-ı sıgār-ı Ahmed ve Ayşe ve Halime’ye münhasıra olduğu lede’ş-şer‘i’l-enver sâbit ve mütehakkik oldukdan sonra sıgār-ı mezbûrûnun tesviye-i emirleri için kıbel-i şer‘den mansûbe vasîleri olan mezbûre Fâtıma Hâtun’un hâlâ zevci ve tarafından husûs-ı âtîye vekîl olup zât-ı mezbûreyi ma‘rifet-i şer‘iyye ile ârifân olan Mehmed Bey b. İsmail ve Abdünnebî b. Hızır nâm kimesneler şehâdetleriyle şer‘an vekâleti sâbite olan Ahmed Efendi b. Mehmed meclis-i şer‘-i şerîf-i enverde, medîne-i Mostar’da el-Hâc Hüseyin mahallesinde sâkin işbu bâ‘isü’l-kitâb el-Hâc Hasan Efendi b. Ali Çelebi mahzarında bi’l-vekâle ikrâr ve i‘tirâf edip, merhûm-ı mûmâ-ileyhin düyûnu terekesini müstağrika olmağla, Mostar’da olan zikri âtî emlâk ve eşyâsı bey‘ olunmak lâzım olmağla, müvekkilem mezbûre Fâtıma Hâtun merhûm-ı mezbûra babası mezbûr Halil b. Ferhad ve vâlidesi Halime bt. Seydî’den bi’l-irsi’ş-şer‘î isâbet eden medîne-i mezbûrede Şari İbrahim Ağa mahallesinde vâki‘ tarafeyni Hasan Çelebi menzili ve tarafeyni tarîk-i âm ile mahdûd matbah ve kiler ve sofa ve hadîka-i yesîre-i müştemil mülk menzilden ve Nolice nâm karyede vâki‘ lede’l-ahâlî ve’l-cîrân ma‘lûmü’l-hudûd mülk menzilden ve üç kıt‘a bağ ve beynlerinde ilm-i şer‘le ma‘lûm ber-mûceb-i defter-i kassâm esâs-ı beytden [ve] mezbûr mahalde vâki‘ ma‘lûmü’l-hudûd menzilden ve Orman karyesinde vâki‘ ma‘lûmü’l-hudûd mülk menzilden sülüsân hisseyi, bi safkatin vâhidetin mezbûr el-Hâc Hasan Efendi’ye semen-i misilleri olan yüz kırk guruş ile meclis-i bey‘de aynı muzî‘a mechûlü’l-aded bir aded fıddâ fülûsa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk, ol dahi iştirâ ve kabûl ve temellük eyledikden sonra semeni olan meblağ-ı mezbûr yüz kırk esedî guruşu yedinden alıp kabz edip, emlâk-i mezbûreyi mahallinde kabz ve tasarrufa mezkûr el-Hâc Hasan Efendi’yi taslît eyledim. Ba‘de’l-yevm emlâk-i mezkûrede müvekkil-i mezbûrun sülüsân hissesi mezkûr el-Hâc Hasan Efendi’nin mülk-i müşterâsıdır, keyfe mâ yeşâ mutasarrıf olsun dedikde, gıbbe’t-tasdîki’ş-şer‘î, mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Cumâdelâhire sene 1102. Şuhûdü’l-hâl: El-Hâc Ahmed Çelebi b. Mustafa, el-Hâc Sâlih b. Abdullah, Mustafa Efendi b. ( ) Mostarî, el-Hâc Sâlih b. Ahmed.