Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 203 Hüküm no: 208 Orijinal metin no: [39b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Macar asıllı Cora bt. Abdullah’ın azad edildiği Mahmiye-i Kostantıniyye’de Kızılminâre mahallesi sükkânından olup sipâh tâifesinin kethüdâsı olmakla bundan akdem şark seferinde müteveffâ olan Yusuf Kethüdâ b. Abdullah nâm kimesnenin verâseti, zevce-i metrûkesi Selime bt. Kurd nâm hâtun ile li-ebeveyn ammi zâdesi İbrahim Bey b. Musa nâm cündîye münhasıra olmakla, terekesinin rub‘u zevcesine ve selâse-i erbâ‘ı ammizâdesine isâbet eylediği zâhir ve müte‘ayyin oldukdan sonra mezbûr İbrahim Bey meclis-i şer‘-i kavîmde, işbu hâfız-ı hâze’r-rakīm orta boylu açık kaşlı elâ gözlü ak benizli ve kolunda iki siyah hâli ve sol elinde eser-i cerâhati olan Macariyyetü’l-asl Coza bt. Abdullah mahzarında bi tav‘ihî ikrâr ve takrîr-i kelâm edip, merkūme Coza bundan esbak mûrisim müteveffâ-yı mezbûr Yusuf Kethüdâ’nın câriye-i memlûkesi olup, ba‘de vefâtihî bi tarîki’l-irsi’ş-şer‘î zevce-i metrûkesi merkūme Selime Hâtun ile bana intikāl etmekle, merkūme Selime Hâtun câriye-i merkūmede vâki‘ rubu‘ hissesini i‘tâk etmiş imiş. El-hâletü hâzihî [40a] ben dahi mevsûfe-i merkūme Coza’da vâki‘ olan selâse-i erbâ‘ hissemi hasbeten lillâhi’l-Hallâk tahrîr ve i‘tâk eyledim. Min ba‘d mevsûfe-i merkūme Coza sâir harâyir-i asliyyât gibi hurre olup üzerinde hakk-ı velâdan gayrı hakkım kalmadı dedikde, gıbbe’t-tasdîk mâ vaka‘a bi’t-taleb ketb olundu. Tahrîren fî evâsıtı Rebî‘ilevvel min şuhûri sene selâsin ve erba‘în ve elf. Şuhûdü’l-hâl: Ahmed Bey b. Mehmed, Hüseyin Çavuş b. Halil, Hasan Çavuş b. Abdullah, Veli Beşe b. Abdullah, el-Hâc Osman b. Abdullah.