Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 203 Hüküm no: 209 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merdümân Şah Hatun Vakfı mütevellîsinin Attâr Mehmed Vakfı’na ait olan menzile müdahale etmemesi Mahmiye-i Kostantıniyye’de vâki‘ merhûm Attâr Mehmed Vakfı’nın bi’l-fi‘il mütevellîsi olan bâ‘isü’l-kitâb Ahmed Çavuş b. Abdüllatîf nâm kimesne meclis-i şer‘de, mahmiye-i merkūmede merhûme Merdümân Şah Hâtun Vakfı’nın elân mütevellîsi olan el-Hâc Mustafa nâm kimesne mahzarında takrîr-i kelâm edip, mahmiye-i merkūmede el-Hâc Küçük mahallesi nâm mevzi‘de vâki‘ iki tarafı merkūm Attâr Mehmed Vakfı’ndan olan odalar ve bir tarafı merhûme Şah Hûbân Hâtun Vakfı ve taraf-ı âharı tarîk-i âm ile mahdûd olup fevkānî ve tahtânî dört bâb odayı ve müşterek kenîfi ve bi’r-i mâyı hâvî hâzır bi’l-meclis olan İlya v. Yehpe nâm Yahudi taht-ı icâresinde olan menzil mütevellîsi olduğum sâlifü’z-zikr Attâr Mehmed Vakfı’ndan olup, âhar vakfın alâkası yoğiken mezbûr Mustafa menzil-i mezbûr mersûme Merdümân Şah Hâtun Vakfı’ndan olmak zu‘mu ile müdâhale ve ta‘arruzdan hâlî olmamakla, mezbûr el-Hâc Mustafa ile mukaddemâ hâkimü’ş-şer‘ huzûrunda murâfa‘a olduğumuzda zikr olunan menzil sâbıku’z-zikr Attâr Mehmed Vakfı’ndan olduğu zâhir ve müte‘ayyin olup, mezbûr el-Hâc Mustafa bi gayri vech-i şer‘î ta‘arruz etmemek için yedime hüccet-i şer‘iyye verilmişiken, merkūm el-Hâc Mustafa yine bî-vech müdâhale etmekle, yedimde olan hüccete nazar olunup, min ba‘d bi gayri vech-i şer‘î müdâhale etmemek için tenbîh olunmak taleb ederim dedikde, kırk üç senesi el-Muharremü’l-harâmının üçüncü günü târihiyle müverraha ve mahmiye-i merkūmede muhâsebât-ı evkāf mahkemesinde nâibü’ş-şer‘ olan Mevlânâ Ahmed Efendi’nin imzâsıyla mümzâ ve hâtemiyle mahtûme ve mefhûmu min külli’l-vücûh takrîr-i meşrûhuna mutâbıka hüccet-i şer‘iyye ibrâz edicek, mûcebince mezbûr el-Hâc Mustafa menzil-i merkūma bi gayri vech-i şer‘î ta‘arruz etmemek için tenbîh olunup, mâ vaka‘a bi’t-taleb ketb olundu. Tahrîren fî selhi Muharremü’l-harâm li sene selâsin ve erba‘în ve elf. Şuhûdü’l-hâl: Hüseyin b. Ahmed, Yusuf Bey b. Abdullah, Dilaver b. Abdullah, Piyâle Çavuş b. Abdullah.