Bab Mahkemesi 54 Numaralı Sicil (H. 1102 / M. 1691) cilt: 20, sayfa: 219 Hüküm no: 248 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Receb’in, küçük kardeşi Ayşe’nin bakımını üstlenmesi Mahmiye-i İstanbul’da Manisalı Çelebi mahallesinde sâkin iken bundan akdem fevt olan Hacı Receb b. Hasan nâm kimesnenin sulbiye kebîre kızı Hatice nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, müteveffâ-yı mezbûrun zevcesi Fâtıma bt. ( ) nâm hâtun mahzarında takrîr-i kelâm ve bast-ı merâm edip, li eb kız karındaşım işbu sagīre Ayşe’nin vâlidesi mezbûre Fâtıma nefsini âhara tezvîc etmekle hidâne sâkıt olmağın, hâlâ bi hakkı’l-hidâne sagīre-i mezbûre Ayşe’yi bana teslîme mezbûre Fâtıma’ya tenbîh olunmak matlûbumdur suâl olunsun dedikde, gıbbe’s-suâl mezbûre Fâtıma cevâbında, hâl bâlâda tafsîl olunan minvâl üzre olduğunu ikrâr ve i‘tirâf etmeğin, sagīre-i mezbûre Ayşe’yi kız karındaşı mezbûre Hatice’ye teslîme ba‘de’t-tenbîh mezbûre Hatice sagīre-i mezbûre Ayşe’yi kendi mâlıyla infâk ve iksâ etmeğe ta‘ahhüd etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Mehmed b. Yusuf, Mustafa Çelebi b. Şaban, Mehmed b. Ahmed, Hüseyin b. Mustafa ve gayruhüm.