Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 213 Hüküm no: 221 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Ali Efendi’nin borcunu ödediği Dârü’s-saltaniyye mahmiye-i Kostantıniyye’de Kirmasti mahallesi ahâlîsinden müderrisîn-i kirâm zümresinden umdetü’l-mehâdîmi’l-kirâm Mehmed Efendi b. el-müvellâ el-merhûm Ali Efendi nâm kimesne meclis-i şer‘-i hatîr-i lâzımü’t-tevkīrde, işbu hâfızu’l-kitâb kıdvetü ulemâ’i’s-sâde Sermahfilzâde b. el-merhûm İsmail Efendi’nin birâderi ve ikrâr-ı âti’l-beyânı tasdîka sâbitü’l-vekâle vekîli olan Ahmed Çelebi mahzarında bi tav‘ihî ikrâr ve takrîr-i kelâm edip, sâbıkan müvekkil-i mûmâ-ileyh Mehmed Efendi’nin zimmetinde deyn-i şer‘îden olan yirmi iki bin akçe hakkımın on bir bin dört yüz akçesini zevce-i mutallakam olup, mûmâ-ileyh Mehmed Efendi’nin halîlesinin hemşîresi olan Fâtıma bt. el-merhûm Rıdvan Efendi nâm hâtuna yevmî yirmişer akçeden üç aylık nafaka iddeti olan bin sekiz yüz akçe ile kezâlik yevmî yirmişer akçe hesâbı üzre sagīr oğlu Ali’nin on altı aylık nafaka mefrûzası olan dokuz bin altı yüz akçe mukābelesinde müvekkil-i mûmâ-ileyh Mehmed Efendi’nin kabûlünü ve merkūme Fâtıma Hâtun’un rızâsını hâviye havâle-i sahîha-i şer‘iyye ile havâle eylediğimde, müşârunileyh Mehmed dahi ba‘de kabûlü’l-havâle meblağ-ı merkūm on bir bin dört yüz akçeyi bi’t-tamâm merkūme Fâtıma Hâtun’a edâ ve teslîm edip ve mâ‘adâsı olan on bin altı yüz [42b] akçenin dahi üç bin üç yüz akçesini mukaddemâ yedinden nakid alıp kabz etmekle, zimmetinde yedi bin üç yüz akçe bâkī kalmışdı. El-hâletü hâzihî zikr olunan yedi bin üç yüz akçeyi dahi meclis-i şer‘de vekîl-i merkūm Ahmed Çelebi’nin yedinden bi’t-tamâm ve kemâl alıp kabz eyledim. Min [ba‘d] bâlâda zikr olunan yirmi iki bin akçe hakkımdan müvekkil-i mûmâ-ileyh Mehmed Efendi zimmetinde bir akçe ve bir habbe bâkī kalmadı dedikde, mukırr-ı mûmâ-ileyh Mehmed Efendi’yi kelimât-ı meşrûhasında mezbûr Ahmed Çelebi dahi bi’l-vekâle tasdîk ve tahkīk edicek, mâ vaka‘a bi’t-taleb ketb olundu. Tahrîren fî evâsıtı Rebî‘ilevvel min şuhûri sene selâsin ve erba‘în ve elf. Şuhûdü’l-hâl: Umdetü’l-müderrisîn Mehmed Efendi el-ma‘rûf bi Hâşimîzâde, Nuh Efendi el-Müderris, Fahrü’l-kuzât Mehmed Efendi b. Mehmed el-Kâtib, Ali Çelebi b. Abdullah, Ali Şah el-acemî es-Sahhâf, Yusuf Bey b. Şaban el-muhzır.