Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 214 Hüküm no: 222 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavlaki v. Sanos’un Kiro v. İstati’ye olan borcundan dolayı zimmetini ibrâ ettiği Mahmiye-i İstanbul’da Karamyo? mahallesi sâkinlerinden Kiro v. İstati nâm zimmî meclis-i şer‘-i hatîr ve dîvân-ı âlî -dâme mahfûfen bi’l-me‘âlî-de yine mahmiye-i merkūme mahallâtından el-Hâc İsâ mahallesinde sâkin Pavlaki v. Panayos nâm zimmî muvâcehesinde üzerine takrîr-i da‘vâ edip, bundan akdem mezbûr Pavlaki’ye mâl-ı hâlisimden iki sahtiye samur kürkümü bin aded riyâlî guruşa bey‘ ve teslîm edip, ol dahi iştirâ ve tesellüm eylemişdi. Hâlâ meblağ-ı mezbûru merkūm Pavlaki’den taleb ederim dedikde, gıbbe’s-suâl mezbûr Pavlaki cevâbında, mukaddemâ mezbûr Kiro vech-i meşrûh üzre benden iki sahtiye samur kürk bahâsından bin guruş da‘vâ ve taleb eyledikde, ben dahi inkâr edip beynimizde münâza‘ât-ı kesîre vukū‘undan sonra tavassut-ı muslihîn ile mezbûr Kiro ile üç yüz kıt‘a riyâlî guruş üzerine sulh olup, bedel-i sulh olan meblağ-ı mezbûr üç yüz kıt‘a riyâlî guruşu yedinden bi’t-tamâm ve’l-kemâl kabz eyledikden sonra da‘vâ-yı mezkûreden ve mukaddemâ Boğdan voyvodası olan Aleksandra v. Rado’ya ikrâz eylediğim beş yük akçeye gāib ani’l-meclis olan Dimitri v. Kosti ve Hiristoyili v. Kalaskos ve Kostantin v. Dimitri ve gayrı nâm zimmîler ile meblağ-ı mezbûra beş kefîl olup zimmetinde cihet-i kefâletden yüz yirmi beş bin nakd-i râyic fi’l-vakt akçem vardır deyü benden cihet-i kefâletleri taleb eylediği yüz yirmi beş bin akçe da‘vâsından zimmetimi ibrâ-i âm ile ibrâ ve iskāt-ı tâm ile iskāt eylediğini bin otuz iki senesi Zilhicce’sinin on yedinci günü Balat mahkemesinde nâibü’ş-şer‘ olan Mevlânâ Abdülhalim Efendi b. Ahmed huzûrunda i‘tirâf edip, hüccet-i şer‘iyye tahrîr olunmuşdu deyü târih-i mezbûr ile müverraha ve mevlânâ-yı mezbûrun hat ve hâtemini müştemile husûs-ı mezbûru nâtıka hüccet-i şer‘iyye ibrâz edip nazar ve mezbûr Kiro muvâcehesinde kırâ’at olunup istintâk olundukda, cevâbında mazmûn-ı hüccet-i merkūmeyi münkir olmağın, mezkûr Pavlaki’den mazmûn-ı hüccet-i mesfûreye beyyine taleb olundukda, zeyl-i hüccet-i mezkûrede mastûrü’l-esâmî olan Müslimîn’den İsmail Dede b. Mehmed el-İmâm ve Sefer Halîfe b. Veli el-İmâm ve Abdülkerim b. Abdurrahim nâm kimesneler li ecli’ş-şehâde mahfil-i kazâda hâzirûn olup gıbbe’l-istişhâd, fi’l-vâki‘ müdde‘î-i mezkûr Kiro Pavlaki’den zikr olunan kürk bahâsından da‘vâ edip ol dahi inkâr eylediği bin guruşdan tavassut-ı muslihîn ile üç yüz guruş üzerine sulh olup, bedel-i sulh olan meblağ-ı mezbûr üç yüz guruşu bizim huzûrumuzda merkūm Pavlaki yedinden alıp kabz eyledikden sonra zimmetini da‘vâ-yı mezkûrdan ve mukaddemâ mezbûrûn vech-i meşrûh üzre cihet-i kefâletden eylediği yüz yirmi beş bin akçe da‘vâsından zimmetini ibrâ-i âm ile ibrâ ve iskāt-ı tâm ile iskāt eyleyip, hüccet-i merkūme mezkûr Kiro’nun muvâcehesinde tahrîr olundu. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra bu …? ile mezkûr Kiro min ba‘d bi gayri vech merkūm Pavlaki’ye mu‘ârazadan men‘ olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min şehri Rebî‘ilevvel li sene selâsin ve erba‘în ve elf. Şuhûdü’l-hâl: Fahrü’l-akrân Yusuf Ağa b. Kadı reisü’l-muhzırîn, el-Hâc Abbas b. İbrahim, Musli Bey b. Musa, Ali b. Hüseyin, Osman Çavuş b. Abdullah, Murad Çavuş b. Hüseyin, Diğer Osman Çavuş b. Ali, Yunus Efendi b. ( ) el-kadı.