Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 215 Hüküm no: 223 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Mehmed’in Ahmed Çavuş b. Veli’yi vekil tayin ettiği Vilâyet-i Anadolu’da kasaba-i Tokat’da Meydan mahallesi ahâlîsinden olup, bundan akdem Çorum sancağı beyi olan fahrü’l-ümerâ Ahmed Bey b. Mehmed zikr olunan Meydan mahallesinde vâki‘ olup, kendiye intimâ ile her biri inde ahâli’d-diyâr ma‘lûmü’l-hudûd olan üç bâb mülk sarayını ve yine kasaba-i merkūme tevâbi‘inden Cincife nâm karye kurbunda cârî nehir üzerinde dâyir olup, kezâlik ma‘lûmü’l-hudûd olan üç göz mülk değirmenini bey‘ ve esmânını kabza ve esmân-ı merkūmeden dergâh-ı âlî yeniçerileri odabaşılarından on sekizinci ağa bölüğünün odabaşısı İbrahim Beşe b. Abdullah nâm kimesneye cihet-i karzdan olan bin dokuz yüz altmış riyâlî guruş ve kırk üçüncü cemâ‘atin odabaşısı Mehmed Beşe b. Abdullah nâm kimesneye olan sekiz yüz riyâlî guruş ve elli beşinci cemâ‘atin odabaşısı diğer İbrahim Beşe b. Haydar nâm kimesneye olan dokuz yüz riyâlî guruş ve elli altıncı cemâ‘atin odabaşısı İsâ Beşe b. Ahmed nâm kimesneye olan bin dokuz yüz riyâlî guruş ve zikr olunan kırk üçüncü cemâ‘atin vekîlü’l-harcı Ahmed Beşe b. Şaban nâm kimesneye olan sekiz yüz riyâlî guruş ve düyûnunu edâ ve îfâya ve fazlasını kendiye îsâle ve kabz [ve] îsâl tevakkuf eylediği umûrun cümlesine der-i devlet çavuşlarından işbu bâ‘isü’l-kitâb Ahmed Çavuş b. Veli nâm kimesneyi azl ve in‘izâlden ârî ve nehc-i sıhhat ve sedâddan cârî olan vekâlet-i devriye ile vekîl edip, şol vech üzre ki mezbûr Ahmed Çavuş’u her bâr vekâletden azl eyledim yine vekîl ola deyü vekâlet-i ma‘hûde ile vekîl ve nâib-i menâb nasb ve ta‘yîn eyledikde, merkūm Ahmed Çavuş dahi vekâlet-i merkūmeyi kabûl ve hidmet-i lâzımesini edâya ta‘ahhüd ve iltizâm edicek, mâ vaka‘a bi’t-taleb ketb olundu. Tahrîren fi’l-yevmi’s-sâmin min şehri Rebî‘ilevvel li sene selâsin ve erba‘în ve elf. Şuhûdü’l-hâl: Umdetü’l-ulemâ es-Seyyid Mahmud Efendi el-münfasıl an kazâ-i ordu-yı hümâyûn, Mehmed Ağa el-ma‘rûf bi …? damadı, Ahmed Bey kethüdâ-yı Mehmed Ağa el-merkūm, Ali Ağa b. Abdülhalim el-Cündî, Hasan Bey b. Abdullah el-Cündî, Ali Beşe b. Abdullah, İbrahim Beşe b. Abdullah er-Râcil, Ahmed b. Abdullah.