Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 216 Hüküm no: 224 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan’ın kiralık oda konusunda Ahmed Çavuş’a yaptığı muârazadan men edildiği Dergâh-ı âlî yeniçerileri çavuşlarından fahrü’l-akrân Ahmed Çavuş b. Pir Veli meclis-i şer‘-i şerîfde Ramazan b. ( ) nâm kimesne mahzarında üzerine takrîr-i da‘vâ edip, mahmiye-i İstanbul’da Kaliçeciler hânında vâki‘ lede’l-ahâlî ve’l-cîrân ma‘lûmü’l-hudûd olan bir bâb Haseki Vakfı’ndan olan oda icâre-i mu‘accele ve yevmî iki akçe ücret-i müeccele ile karındaşım olup bundan akdem vefât eden Hacı Mehmed’in yedinde olup, ba‘de vefâtihî evlâdı kalmayıp zikr olunan oda mahlûle oldukda zikr olunan odayı mezbûr Ramazan ve gāib ani’l-meclis olan Abdülganî nâm kimesne ale’l-iştirâki’s-seviy vakf-ı mezbûr mütevellîsi olan İbrahim Ağa’dan izn-i mütevellî ile tefevvuz eylediklerinden sonra mezbûr Ramazan ve gāib ani’l-meclis olan Abdülganî yine zikr olunan odayı bana tefvîz edip, ben dahi tefevvuz ve kabûl eyledikden sonra ikisi yedimden bedel-i tefevvuz beş bin nakd-i râyic fi’l-vakt akçe alıp kabz edip, zikr olunan oda hâlâ benim tasarrufumda iken mezbûr Ramazan benim tasarrufuma mâni‘ olur, suâl olunup mu‘ârazadan men‘ olunmak matlûbumdur dedikde, gıbbe’s-suâl mezbûr Ramazan cevâbında husûs-ı mezbûru münkir olmağın, müdde‘î-i mezbûr Ahmed Çavuş’dan sıdk-ı da‘vâsına beyyine taleb olundukda, udûl-i ricâlden Yusuf b. Abdullah ve Ali b. Yunus nâm kimesneler li ecli’ş-şehâde mahfil-i kazâya hâzırân olup gıbbe’l-istişhâd, fi’l-vâki‘ zikr olunan odanın nısfı gāib ani’l-meclis olan Abdülganî ve nısf-ı âharını mezkûr Ramazan bizim huzûrumuzda izn-i mütevellî-i vakf-ı mezbûr ile müdde‘î-i mezbûr Ahmed Çavuş’a ferâğ ve tefvîz edip, ol dahi tefevvuz ve kabûl eyledikden sonra yedinden bedel-i tefvîz beş bin nakd-i râyic fi’l-vakt akçe alıp kabz eyledi. Biz bu husûsa şâhidleriz şehâdet dahi ederiz deyü edâ-yı şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra min ba‘d mezbûr Ramazan müdde‘î-i mezkûr Ahmed Çavuş’a bi gayri vech mu‘ârazadan men‘ olunup, mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ilevvel li sene selâsin ve erba‘în ve elf. Şuhûdü’l-hâl: Mehmed b. Ahmed, Kurd b. Hasan, Yusuf b. Şaban, Mehmed b. Ali ve gayruhüm.