Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 217 Hüküm no: 225 Orijinal metin no: [43a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf arsanın Âbide Hatun bt. Seyyid Mehmed Efendi’ye tevcih edildiği Mahmiye-i İstanbul’da Çıkrıkçı mahallesinde vâki‘ bir tarafdan ba‘zan İbni Necib Vakfı’ndan olan mekteb ve ba‘zan Çorbacızâde mülkü ve ba‘zan İhsan Halîfe Vakfı’ndan olan menzil ve tarafeynden Medîne-i Münevvere Vakfı olan menzil bir tarafı tarîk-i âm ile mahdûd olan menzil-i mezbûra mülâsık olup, lede’l-ahâlî ve’l-cîrân hudûdu ma‘lûme olan menzili bundan akdem Ali Çelebi b. Mehmed nâm sâhibü’l-hayr vakf ve süknâsını günde bir cüz’-i şerîf tilâvet etmek üzre sulehâdan birine şart etmeğin, ber mûceb-i şart-ı vâkıf menzileyn-i mezbûreyne bundan akdem tevcîh-i hâkimü’ş-şer‘le mutasarrıf olan umdetü’l-ulemâ es-Seyyid Mehmed Efendi b. el-merhûm es-Seyyid Hayreddin Efendi vefât eyledikden sonra menzileyn-i mezbûreyn muhterik olup arsa-i hâliye kalıp bir mahal ve müstahıkka tevcîh olunmak lâzım geldikde, arsaları yine müşârunileyh es-Seyyid Mehmed Efendi’nin kerîme-i mükerremesi olup her vechile müstahıkka olan işbu sâhibetü’l-kitâb Âbide Hâtun’a tevcîh olunup, tasarrufu için işbu hurûf ber sebîl-i temessük ketb ve yedine def‘ olundu. Tahrîren fi’l-yevmi’s-sânî [min] şehri Rebî‘ilâhir li sene selâsin ve erba‘în ve elf. Şuhûdü’l-hâl: Fahrü’l-a‘yân Veli Ağa b. Mustafa, Zahrü’l-emsâl Yusuf Ağa b. ( ) reisü’l-muhzırîn, Hüseyin Çelebi b. Ahmed, Mehmed Beşe b. Yusuf çukadâr.