Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 219 Hüküm no: 228 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Mustafa’nın ödünçten dolayı Hüseyin Efendi’den alacağı olduğu Dergâh-ı âlî -dâme mahfûfen bi’l-me‘âlî- kapıcılarından işbu bâ‘isü’l-kitâb fahrü’l-emâsil ve’l-a‘yân Mehmed Ağa b. Mustafa nâm kimesne meclis-i şer‘-i hatîr-i lâzımü’t-tevkīrde, vilâyet-i Rumeli’nde Yenişehir kazâsında vâki‘ Lajde nâm kasabada bundan akdem müteveffâ olan Hüseyin Efendi nâm cündînin sulbî oğlu ve vârisi olup muhallefâtına vâzı‘u’l-yed olan Abdülbâkī Bey nâm kimesne mahzarında üzerine takrîr-i da‘vâ edip, müteveffâ-yı merkūm Hüseyin Efendi zimmetinde cihet-i karz-ı şer‘îden iki yüz riyâlî guruş hakkım olmağın muhallefâtından alıverilmek taleb ederim dedikde, gıbbe’s-suâl merkūm Abdülbâkī Bey cevâbında, müdde‘î-i merkūm Mehmed Ağa’nın hakkı olduğu ma‘lûmum değildir deyü bi’l-külliye inkâr edicek, müdde‘î-i merkūmdan müdde‘âsını mübeyyine beyyine taleb olundukda, udûl-i Müslimîn’den mahmiye-i Kostantıniyye’de Nahilbend mahallesinden Ali b. Mehmed ve Atpazarı mahallesinden Mehmed b. İbrahim nâm kimesneler li ecli’ş-şehâde hâzırân olup akībe’l-istişhâd, fi’l-vâki‘ müdde‘î-i merkūm Mehmed Ağa’nın müteveffâ-yı merkūm Hüseyin Efendi zimmetinde cihet-i karz-ı şer‘îden iki yüz riyâlî guruş hakkı olduğu ma‘lûmumuzdur, bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, ba‘de ri‘âyet-i şerâiti’l-kabûl şehâdetleri makbûle oldukdan sonra müdde‘î-i merkūm Mehmed Ağa meblağ-ı merkūmu müteveffâ-yı merkūmdan hâl-i hayâtında külliyen ve ba‘zan alıp kabz etmeyip ve hibe ve âhara havâle etmeyip bir vechile ahz ve istîfâ ve zimmetini ibrâ etmediğine gıbbe’l-istihlâfi’ş-şer‘î yemîn billâhi’l-azîm edicek, mûcebiyle edâsına tenbîh olunup, mâ vaka‘a bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: Fahrü’l-a‘yân Mirza Çavuş b. Mustafa, Yusuf Bey b. Gāzi el-bevvâb, Piyâle Çavuş b. Abdullah, İskender b. Şaban, Yahya b. Zekeriya, Mirza Çavuş b. Mustafa, Veli Bey b. Mustafa, Mehmed b. İbrahim.