Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 220 Hüküm no: 229 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Paşa’nın Manol v. Apostol’un gemisinden aldığı malları geri vermesi gerektiği Akdeniz cezâirinden nefs-i cezîre-i Midilli’de sâkin olan mellâh tâifesinden Manol v. Apostol nâm zimmî dîvân-ı keyvân-ı eyvân-ı sultânî -dâme medâru’l-emn ve’l-emânî- de meclis-i şer‘-i hatîr-i lâzımü’t-tevkīrde, sâbıkan Trablus-ı Mağrib Paşası olup beyne’l-ahâlî Kefelioğlu demekle ma‘rûf Süleyman Paşa mahzarında üzerine takrîr-i da‘vâ ve tasdîr-i müdde‘â edip, bundan akdem silk-i mülkümde münselik olan eşyâmdan on bin aded kösele ve yirmi bin aded sahtiyânı İzmir iskelesinden sefîneme tahmîl edip ticâret için Frengistan’a giderken Trablus-ı Mağrib kurbunda deryâda Memi kapudan nâm kimesne benim sefînemi ahz edip, sefîne-i merkūmeye tahmîl eylediğim zikr olunan on bin aded kösele ve yirmi bin aded sahtiyân ile Trablus-ı Mağrib iskelesine getirdikde, zikr olunan on bin köselenin öşrü olmak üzre her dâneye ikişer riyâlî guruşdan iki bin riyâlî guruş kıymetli bin aded kösele ve her dâneye üç rub‘ riyâlî kuruş kıymetli iki bin aded sahtiyânımı mûmâ-ileyh Süleyman Paşa gasb ve ahz edip, mâ‘adâsını ba‘zı kimesneler mâbeynlerinde kısmet eylediler, suâl olunup mezbûr Süleyman Paşa’nın ahz eylediği eşyâ-i mezkûrenin mevcûde ise a‘yânını hâlike ise kıymet-i meşrûhalarını mûmâ-ileyh Süleyman Paşa’dan taleb ederim dedikde, gıbbe’s-suâl ve akībe’l-inkâr, müdde‘î-i mezbûrdan sıdk-ı da‘vâsına beyyine taleb olundukda, udûl-i ricâlden olup mahmiye-i İstanbul’da Kızıltaş mahallesinde sâkin Hızır Bey b. Murad ve medîne-i Ebâ Eyyûb-i Ensârî -aleyhi’r-rahmetü’l-bârî- de vâki‘ Kızılmekteb demekle ma‘rûf mekteb kurbunda sâkin olan Hızır b. Abdullah nâm kimesneler li ecli’ş-şehâde mahfil-i kazâya hazırân olup gıbbe’l-istişhâd, fi’l-vâki‘ müdde‘î-i mezbûr Manol’un sefînesini zikr olunan Memi kapudan ahz edip Trablus-ı Mağrib iskelesine getirdikde, mûmâ-ileyh Süleyman Paşa müdde‘î-i mezbûrun sefînesinden her dânesi ikişer riyâlî guruş kıymetli bin aded kösele ve her biri [44b] üçer rub‘ riyâlî guruş kıymetli iki bin aded sahtiyânını sefînesinde mahmûl olan on bin aded kösele ve yirmi bin aded sahtiyânı içinden bizim huzûrumuzda gasb ve ahz eyledi. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mûcebi ile hükm birle mâ hüve’l-vâki‘ bi’t-taleb ketb olundu. Tahrîren fî evâhiri’l-Muharremi’l-harâm li sene selâsin ve erba‘în ve elf. Şuhûdü’l-hâl: Fahrü’l-a‘yân Veli Ağa, Zahrü’l-akrân Mirza Çavuş b. ( ), Fahrü’l-akrân Yusuf Ağa b. Kadı reisü’l-muhzırîn, Mehmed Beşe b. Yusuf çukadâr, Ahmed Çelebi b. Hüseyin, Rıdvan b. Abdullah, el-Hâc Mahmud b. ( ), Mehmed b. ( ).