Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 226 Hüküm no: 236 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Efendi b. Abdi’nin terekesinin taksim edildiği Mahmiye-i Kostantıniyye’de Bucak mahallesinde bundan akdem müteveffâ olan Rıdvan Efendi b. Abdi nâm kimesnenin verâseti, zevce-i metrûkesi Rahime bt. Ömer nâm hâtun ile sulbiye kızları Emine ve Aişe nâm hâtunlara münhasıra olup, ba‘de’l-iktisâm kızı merkūme Aişe Hâtun dahi müteveffât olup vâlidesi merkūme Rahime Hâtun ile li-ebeveyn kızkarındaşı mersûme Emine Hâtun’a münhasıra olmakla, terekesinin bi tarîki’r-red tashîh-i mes’elesi olan beş sehimin iki sehimi vâlidesine ve üç sehimi kızkarındaşına isâbet eylediği zâhir ve müte‘ayyin oldukdan sonra merkūmetân Rahime Hâtun ve Emine Hâtun meclis-i şer‘a gelip her biri takrîr-i kelâm edip, müteveffâ-yı merkūm Rıdvan Efendi’nin muhallefâtından mahalle-i merkūmede büyût-ı müte‘addideyi müştemil olup, bir tarafı Asiye Hâtun ve Mustafa Çelebi mülkleri ve bir tarafı Fâtıma Hâtun Vakfı ve bir tarafı diğer Fâtıma Hâtun mülkü ve Mühreci Sinan ve Emine Hâtun vakıfları ve bir tarafı tarîk-i hâs ile mahdûd olup, bi tarîki’l-irsi’ş-şer‘î ikimize ve kızı müteveffât-ı merkūme Aişe Hâtun’a intikāl etmekle, mukaddemâ savb-ı şer‘den nâib ve mi‘mâr irsâl olunup ahâlî-i vukūf ittifâkı ile ba‘de’l-mesâha menzil-i merkūmun ebniye ve arsası on dokuz bin sekiz yüz beş akçeye takvîm olunup her birimizin hissesi ta‘yîn ve teslîm olundukda, merkūme Aişe Hâtun’a tarîk-i hâs tarafında vâki‘ olup sekiz bin altı yüz altmış altı akçe kıymetli iki bâb tahtânî oda ile tûlen ve arzan bi hesâb-i şatrancî yüz altmış altı zirâ‘ arsa ta‘yîn ve hissesi mukābelesinde kendiye teslîm olunup hüccet-i şer‘iyye tahrîr olunmuşdu. Hâlâ zikr olunan iki bâb oda ve yüz altmış altı zirâ‘ arsa bi tarîki’l-irsi’ş-şer‘î ikimize intikāl etmekle, beynimizde bi’t-terâzî taksîm etmek içün birbirimizin hissesi ta‘yîn olunup hüccet-i şer‘iyye verilmek taleb ederiz dediklerinde, zikr olunan sekiz bin altı yüz altmış altı akçe kıymetli ebniye ve yüz altmış altı zirâ‘ arsadan bâ‘isetü’l-kitâb merkūme Emine Hâtun’a tashîh-i merkūm vefkince beş sehimden üç sehim hissesi mukābelesinde beş bin yüz doksan dokuz buçuk akçe kıymetli ebniye ile doksan dokuz buçuk zirâ‘ arsa isâbet edip ve merkūme Rahime Hâtun’a dahi kezâlik beş sehimden iki sehim hissesi mukābelesinde üç bin dört yüz altmış altı buçuk akçe kıymetli ebniye ile altmış altı buçuk zirâ‘ arsa isâbet eylediği merkūmânın talebleri ile ketb ve sûreti yedlerine def‘ olundu. Tahrîren fi’l-yevmi’s-sâbi‘ ve’l-ışrîn min şehri Rebî‘ilâhir min şuhûri sene selâsin ve erba‘în ve elf. Şuhûdü’l-hâl: Es-sâbikūn el-mezbûrûn.