Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 227 Hüküm no: 237 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Bey b. Mustafa’nın Aişe bt. Yusuf’u boşadığı Husûs-ı âti’l-beyânın mahallinde tahrîri itlimâs olunmağın Hüseyin Efendi b. Mehmed irsâl olunup ol dahi mahmiye-i İstanbul’da Hoşkadem mahallesinde Yusuf Bey b. Hüseyin nâm kimesne menziline varıp zeyl-i kitâbda mastûrü’l-esâmî olan müslimîn mahzarlarında akd-i meclis eyledikde, Halil Bey b. Mustafa nâm yesârî meclis-i şer‘de menzil-i mezbûrda sâkine Aişe nâm bikr-i bâliğanın babası ve tarafından husûs-ı âti’z-zikre vekîli olup nehc-i şer‘î üzre vekâleti sâbite olan mezkûr Yusuf Bey mahzarında ikrâr ve takrîr-i kelâm edip mesfûr Yusuf Bey kızı ve müvekkilesi olan merkūme Aişe’yi on beş bin akçe mehr-i müeccel ile bana tezvîc eyleyip ben dahi tezevvüc eyledikden sonra mezkûre Aişe ile halvet-i sahîha olup ve nefsini bana teslîm edip lâkin ben innîn olmağla vusûle kudretim olmamağın mukaddemâ bin otuz dokuz senesi Rebî‘ilevveli gurresinden te’cîl-i şer‘î olunduğumda yine vusûl müyesser olmamağın hâlâ zevcem müvekkile-i mezbûre Aişe’yi talâk-ı bâyin ile tatlîk ve mehr-i müecceli olan meblağ-ı mezbûr on beş bin akçenin on bin akçesini vekîl-i merkūm Yusuf Bey’e def‘ ve teslîm edip, ol dahi kabz ve tesellüm ve mâ‘adâsı olan beş bin akçe ile nafaka-i iddetinden zimmetimi ibrâ eyledi dedikde, ba‘de’t-tasdîki’ş-şer‘î vâki‘ hâli mezbûr Hüseyin Efendi mahallinde tahrîr ve ba‘dehû gelip meclis-i şer‘de ihbâr etmeğin, mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: Yusuf Bey b. Mustafa, İbrahim Çelebi b. Mehmed er-Râcil, Mehmed b. Yusuf, el-Hâc İbrahim b. Hüseyin, el-Hâc Pîrî b. el-Hâc Hasan, Halil Beşe b. Mustafa, Mahmud b. Bâli.