Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 235 Hüküm no: 248 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hasan’ın borcuna Hüseyin b. Ahmed’in kefil olduğu Râfi‘ü’l-kitâb Mehmed Beşe b. Ali nâm râcil mahmiye-i İstanbul’da Horhor demekle ma‘rûf sûkda nalçacı olan Hüseyin b. Ahmed nâm râcili meclis-i şer‘-i şerîfe ihzâr ve üzerine da‘vâ eyleyip, mahmiye-i Galata kazâsına tâbi‘ kasaba-i Kasımpaşa’da Seferikoz mahallesinde sâkin gāib ani’l-meclis olan İbrahim b. Hasan nâm kimesne zimmetinde deyn-i şer‘îden on sekiz bin sekiz yüz fıddî râyic fi’l-vakt akçe hakkım olup, meblağ-ı mezbûrun cümlesine merkūm Hüseyin emr ve kabûlü hâviye kefâlet ile kefîl olmuşdu. Hâlâ meblağ-ı mezbûr on sekiz bin sekiz yüz akçe hakkımı kefâlet-i mahkiyyesi hasebiyle mezkûr Hüseyin’den taleb ederim suâl olunsun deyip gıbbe’s-suâl mezkûr cevâbında, fi’l-hakīka müdde‘î-i mezbûr Mehmed Beşe’nin deyn-i şer‘îden mezkûr İbrahim zimmetinde on sekiz bin sekiz yüz akçe hakkı olup, lâkin ben mezkûr İbrahim’in nefsine ve hîn-i mütâlebede meclis-i şer‘e ihzârına kefîl olmuşdum, meblağ-ı mezbûra kefîl olmadım deyü kefâlet-i mâliyeyi inkâr etmeğin, müdde‘î-i mezkûr Mehmed Beşe’den alâ vefki da‘vâhu beyyine taleb olundukda, sikāt-ı Müslimînden Sofular mahallesinde sâkin Rıdvan b. Abdullah ve Ömer Bey b. Ahmed nâm kimesneler li ecli’ş-şehâde meclis-i şer‘e hâzırân olunup gıbbe’l-istişhâdi’ş-şer‘î, fi’l-hakīka müdde‘î-i mezkûr Mehmed Beşe’nin merkūm İbrahim zimmetinde cihet-i deyn-i şer‘îden hakkı olan on sekiz bin sekiz yüz akçeye merkūm Hüseyin emr ve kabûlü hâviye kefâlet-i şer‘iyye ile bizim huzûrumuzda kefîl olup, biz bu husûsa bu vech üzre şâhidleriz şehâdet dahi ederiz deyü şehâdet-i şer‘iyye eylediklerinde, ba‘de’t-ta‘dîli’ş-şer‘î şehâdetleri makbûle olmağın, mûcebiyle mezbûr Hüseyin meblağ-ı mezbûr on sekiz bin sekiz yüz akçeyi müdde‘î-i mezbûr Mehmed Beşe’ye edâ etmek üzre hükm ve ilzâm olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min Cemâziyelevvel li sene selâsin ve erba‘în ve elf. Şuhûdü’l-hâl: Mehmed Beşe b. ( ) çukadâr, Hızır Bey b. ( ) el-muhzır, İskender Bey b. Şaban, Mehmed b. Ahmed.