Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 236 Hüküm no: 250 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Ağa b. Ramazan’ın değirmenlerin işletmesini İbrahim b. Abdi ile Salih Mehmed b. Ahmed’e verdiği Atebe-i aliyye-i sultâniyede hâlâ matbah-ı âmire emîni olan fahrü’l-emâsil ve’l-akrân Abdi Ağa b. Ramazan meclis-i şer‘-i hatîr-i lâzımü’t-tevkīrde, mîrî simidçilerden İbrahim b. Abdi ve Salih Mehmed b. Ahmed nâm kimesneler muvâcehelerinde takrîr-i kelâm ve bast-ı merâm edip, Yoros kazâsına tâbi‘ Beykoz nâm karyede vâki‘ üç göz mîrî değirmenleri mezbûrân İbrahim ve Salih Mehmed’e teslîm edip, zikr olunan değirmenlerde tathîn olunan buğdayın her müdde biraz gırbâlî çıkdıkdan sonra elek üstüne gelen dakīkden cânib-i mîrîye on dört keyl hâs dakīk verip ve mezbûrlara dahi cânib-i mîrîden her şehirde dokuz bin akçe ücret verilmek üzre kavl ve karâr ve ittifâk ve şedd-i visâk eyledik, suâl olunup takrîrleri tahrîr olunmak matlûbumdur dedikde, gıbbe’s-suâl mezbûrân İbrahim ve Salih Mehmed cevâblarında, fi’l-hakīka müşârunileyh Abdi Ağa zikr olunan değirmenleri bize teslîm edip, minvâl-i meşrûh üzre kavl ve karâr ve ittifâk ve şedd-i visâk eyledik dediklerinde, vâki‘ hâl bi’t-taleb ketb olundu. Tahrîren fî evâhiri Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Fahrü’l-a‘yân Hasan Ağa b. ( ), Zahrü’l-emsâl Hasan Çavuş b. ( ), Mustafa Çavuş b. Davud, Receb Çavuş, Yusuf b. Şaban kethüdâ, Mustafa b. Ali, Ali b. Mustafa, el-Hâc Hasan b. Mehmed, Süleyman b. Murad ve gayruhüm.