Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 254 Hüküm no: 268 Orijinal metin no: [54a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Subaşı b. Derviş’in evini Mehmed Çavuş b. Abdullah’a sattığı << Dârü’s-saltanati’s-seniyye mahmiye-i Kostantıniyye mahallâtından Emîn Nureddin mahallesinde sâkin olan, Atabe-i aliyyede vâki‘ yayabaşılar zümresi zâbitlerinden fahrü’l-emâsil ve’l-akrân İbrahim Subaşı b. Derviş meclis-i şerî‘at-i şerîfe-i garrâ ve mahfil-i tarîkat-i münîfe-i zehrâya hâzır olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i merkūmede vâki‘, tahtânî ve fevkānî ikişer beyti, selâmlığı ve ahırı müştemil bulunan, bir tarafdan Yaya beyi Mehmed Ağa mülkü, diğer tarafdan bâyi‘-i mezkûr mülkü, diğer tarafdan da tarîk-i âm ile mahdûd olan cemî‘-i menzilini cümle hudûdu ve tevâbi‘i ve kâffe-i hukūku ve menâfi‘i ile râyicü’l-vakt aded ve keyfiyet cihetinden mechûl fülûsla doksan bin akçe semen-i mu‘ayyen-i makbûz ile hâfız-ı hâze’l-kitâb zahrü’l-eşbâh Yaya beyi Mehmed Çavuş b. Abdullah’a îcâb kabûlü ve teslîm tesellümü hâvî bey‘-i bât-ı sahîh ile bey‘ ettiğini ikrâr ve i‘tirâf etti. Mezbûr Mehmed Çavuş da kendi mâlıyla ve kendisi içi menzil-i mezkûru ondan iştirâ etti. Vâki‘ ikrâr, müşterî-i merkūm tarafından vicâhen ve şifâhen tasdîk edildi. Cerâ zâlike ve hurrire fi’l-yevmi’r-râbi‘ aşer min şehri Zilhicce eş-şerîfe sene isneyn ve erba‘în ve elf. Şuhûdü’l-hâl: Şaban Subaşı b. Abdünnebî, Hasan Beşe b. İskender er-Râcil, Süleyman Beşe b. Bâli odabaşı, Murtaza Beşe b. İhtiyar, Mustafa Beşe b. Osman, Hasan Bey b. Abdullah er-Râcil ve gayruhüm>>