Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 255 Hüküm no: 269 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. İbrahim’in kaybolan eşyasının Mustafa b. Ali’nin evinde bulunduğu Vilâyet-i Anadolu’da vâki‘ Kayseriye kazâsında Arguncuk nâm karyeden olup hâlâ mahmiye-i Kostantıniyye’de Mi‘mâr Acem mahallesinde sâkine olan bâ‘isetü’l-kitâb Emine bt. İbrahim nâm hâtun tarafından husûs-ı âti’l-beyâna vekîl olup, vekâleti mahzar-ı hasm-ı câhidde Receb Beşe b. Hüseyin ve Durak Beşe b. Abdullah nâm kimesneler şehâdetleri ile sâbite olan İsmail Beşe b. Hüseyin nâm kimesne meclis-i şer‘de, kazâ-i merkūmdan olup elân mahmiye-i merkūmede sâkin Mustafa b. Ali nâm emred muvâcehesinde bi’l-vekâle takrîr-i kelâm edip, bundan akdem müvekkile-i merkūmenin mahalle-i merkūmede vâki‘ menzili açılıp yedimde mevcûd olan defterde mastûr olduğu üzre dâhilinde vâki‘ olup zâyi‘ olan esbâbdan mezbûr Mustafa Bey yedinde bir münakkaş dülbend örtüsü ve iki münakkaş makrama ve bir dokuma uçkur bulunmağın mezbûru bi’l-vekâle ihzâr eyledim, hakīkat-i hâl mezbûr Mustafa’dan suâl olunup takrîri tahrîr olunmak taleb ederim dedikde, gıbbe’l-istintâk merkūm Mustafa cevâbında, mukaddemâ müvekkile-i merkūmenin menzili tarafına vardığımda merkūmenin akrabâsından Kadri nâm kimesne merkūmenin menzilinden bir mikdâr esbâb ile taşra çıkdıkda zikr olunan dülbend örtüsü ve iki münakkaş makramayı ve bir dokuma uçkuru bana teslîm etmek ile ben dahi alıp kabz eyledim idi deyicek, sûret-i hâl zabt-ı makāl için bi’t-taleb ketb ve tahrîr olundu. Tahrîren fi’l-yevmi’r-râbi‘ aşer min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Ömer Beşe b. Mehmed er-Râcil, Hamdi b. Mehmed, Mehmed Bey b. Abdullah, Dilaver Çavuş b. Abdullah, Mehmed b. Abdi ve gayruhüm.