Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 255 Hüküm no: 270 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Azad edilmiş olan Keyvan’ın Eyüb Bey b. Mustafa’nın tasarrufunda bulunduğu Vilâyet-i Anadolu’da Karahisâr-ı sâhib sancağında Şuhud kasabası tevâbi‘inden Haydarlı nâm karyeden Yusuf Bey b. Yahya nâm cündî meclis-i şer‘de, dergâh-ı âlî solaklarından işbu bâ‘isü’l-kitâb Eyüb Bey b. Mustafa nâm kimesne mahzarında takrîr-i da‘vâ edip, işbu hâzır bi’l-meclis olup elân mezbûr Eyüb Bey’in yedinde ve taht-ı tasarrufunda olan uzun boylu gök elâ gözlü sarışın Rûsiyyü’l-asl Keyvan nâm gulâm mukaddemâ benim abd-i memlûkum olup mülkümden ibâk eylemiş idi. Elân mezbûr Eyüb Bey’in yedinde buldum bi gayri vech-i şer‘î vaz‘-ı yed eylemişdir, kasr-ı yedine tenbîh olunmak taleb ederim dedikde, gıbbe’s-suâl mezbûr Eyüb Bey cevâbında, gulâm-ı mevsûf-ı mezbûr bundan akdem maktûlen müteveffâ oldukda terekesi taraf-ı mîrîden kabz olunan İlyas Paşa’nın muhallefâtından olmakla mukaddemâ beytülmâl emîni olup müteveffâ-yı merkūmun terekesine vâzı‘u’l-yed olan Mehmed Ağa nâm kimesneden altmış guruşa iştirâ edip abd-i memlûküm olmakla vaz‘-ı yed ederim, vech-i meşrûh üzre müdde‘î-i merkūmun abd-i memlûku olup mülkünden ibâk eylediği ma‘lûmumuz değildir deyü inkâr edicek, müdde‘î-i merkūmdan müdde‘âsına mutâbık beyyine taleb olundukda, udûl-i Müslimîn’den Şaban b. Yusuf ve Receb b. Mustafa nâm kimesneler li ecli’ş-şehâde hâzırân olup akībe’l-istişhâd, fi’l-vâki‘ gulâm-ı mevsûf-ı merkūm Keyvan müdde‘î-i merkūm Yusuf Bey’in abd-i memlûkü olup, bundan akdem mülkünden ibâk eylediği ma‘lûmumuzdur. Bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, ba‘de ri‘âyet-i şerâiti’l-kabûl şehâdetleri makbûle oldukdan sonra müdde‘î-i merkūm gulâm-ı mersûmu bundan akdem âhara bey‘ veya hibe etmeyip, ve yahud i‘tâk etmeyip vücûh-ı ihrâcdan bir vechile mülkünden ihrâc etmediğine gıbbe’l-istihlâf yemîn billâhi’l-azîm edicek mûcebince gulâm-ı merkūmdan mezbûr Eyüb Bey’in kasr-ı yedine tenbîh birle mâ vaka‘a bi’t-taleb ketb olundu. Tahrîren fî râbi‘ şehri Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Efendi b. İbrahim, Hüseyin Efendi b. Mustafa el-kadı, Mehmed b. Ali, Yusuf Bey b. Abdullah ve gayruhüm.