Bab Mahkemesi 54 Numaralı Sicil (H. 1102 / M. 1691) cilt: 20, sayfa: 222 Hüküm no: 254 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maksud Bey b. Hüseyin’in vefat eden Hacı Halil b. Receb’deki alacağının terekeden ödenmesi Mahmiye-i İstanbul’da Unkapanı kurbunda sâkin işbu bâ‘isü’l-kitâb Maksud Bey b. Hüseyin meclis-i şer‘-i şerîf-i enverde, mahmiye-i mezbûrede Hoca Halil Attâr mahallesinde sâkin iken bundan akdem fevt olan el-Hâc Halil b. Receb b. Ahmed’in evlâd-ı sıgārı Mehmed ve Ayşe ve Sâliha’nın ammileri ve vasiyy-i mansûbları olmağla terekesine vâzı‘u’l-yed olan Mehmed Bey b. Receb mahzarında üzerine da‘vâ ve takrîr-i kelâm edip, müteveffâ-yı mezbûr el-Hâc Halil’in zimmetinde cihet-i karz-ı şer‘îden yüz guruş hakkım olup, hattâ kemâl-i sıhhatinde şuhûd mahzarında ikrâr dahi ettiğinden sonra kable’l-edâ vefât etmeğin, hâlâ vasiyy-i mezbûra suâl olunup meblağ-ı mezbûru tereke-i vâfiyesinden alıverilmek matlûbumdur dedikde, gıbbe’s-suâl merkūm Mehmed Bey cevâbında, karındaşı müteveffâ-yı mezbûrun tereke-i vâfiyesine bi’l-vesâye vaz‘-ı yedini ikrâr, lâkin deyn-i mezbûru inkâr edicek, müdde‘î-i mezbûrdan sıdk-ı makāline muvâfık beyyine taleb olundukda, yine Unkapanı kurbunda sâkin Bayram Bey b. Süleyman ve İsmail Beşe b. Dilaver nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ müteveffâ-yı mezbûr el-Hâc Halil b. Receb b. Ahmed kemâl-i sıhhatinde cihet-i karz-ı şer‘îden müdde‘î-i mezbûr Maksud Bey’e vâcibü’l-edâ ve lâzımü’l-kazâ yüz guruş zimmetinde deyni olduğunu bizim huzûrumuz[da] ikrâr ve bizi işhâd eyledi, biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olup, müdde‘î-i mezbûr Maksud Bey tahlîf-i şer‘î ile tahlîf olundukdan sonra mûcebince ba‘de’l-hükm meblağ-ı mezbûr yüz guruşu tereke-i mezbûreden müdde‘î-i mezbûra edâya vasiyy-i merkūma tenbîh olunup, mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire sene 1102. Şuhûdü’l-hâl: Ahmed Beşe b. İsmail, Küçük Mehmed b. Ahmed, Ahmed Bey b. Bâki, İbrahim Çelebi b. Ahmed.