Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 267 Hüküm no: 286 Orijinal metin no: [58b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Ahmed’in evini Ali Ağa b. Bâli’ye sattığı Mahmiye-i Kostantıniyye mahallâtından Murad Paşa-yı atîk mahallesinde sâkin olan, mahmiye-i merkūme gümrük mukāta‘ası emîn-i sâbıkı umdetü’l-emâcid ve’l-a‘yân Ali Ağa b. Ahmed kıbelinden hasm-ı şer‘î mahzarında âtiyyü’z-zikr bey‘a ve kabz-ı semene vekâleti Mirza Çavuş b. Mustafa ve Hasan Bey b. Abdullah el-Cündî nâm kimesnelerin şehâdetleri ile sâbit olan fahrü’l-emâcid ve’l-eşbâh Yusuf Ağa b. Abdullah el-müteferrika nâm kimesne meclis-i şer‘-i şerîf-i şâmih-i bünyân ve mahfil-i dîn-i münîf-i râsih-i erkânda hâzır olup vekâlet-i mahkiyyesi hasebiyle şöyle ikrâr ve i‘tirâf etti ki, işbu akdin kendilerinden sudûruna kadar müvekkil-i mezbûrunun sâhibi ve mâliki olduğu, elinde ve taht-ı tasarrufunda bulundurduğu, mahalle-i mezbûrede vâki‘ dâhilî ve hâricî avlulu, hâricî avlusu beş fevkānî beyti, beş selâmlığı, üç tahtânî beyti ve su kuyusunu müştemil olan, dâhilî avlusu üç fevkānî beyti, beş selâmlığı, üç tahtânî beyti, su kuyusunu, helâyı ve bahçeyi hâvî bulunan, bir tarafdan Hafsa Hâtun bt. Receb mülkü, diğer tarafdan Solak Hasan Bey b. Abdullah mülkü, öteki tarafdan Halil Çelebi b. Abdullah mülkü, diğer tarafdan da Hâfız Ahmed Efendi veresesi mülkü ve tarîk-i âm ile mahdûd olan cemî‘-i menzilini cümle hudûdu ve kâffe-i hukūkuyla râyicü’l-vakt üç yüz elli bin akçe semen-i mu‘ayyen-i makbûzla kethüdâ beyliğinden münfasıl hâfız-ı hâze’l-kitâb fahrü’l-emâcid ve’l-e‘âlî Ali Ağa b. Bâli’ye îcâb kabûlü ve teslîm tesellümü hâvî bey‘-i bât-ı sahîh ile bey‘ etti. Müşterî-i mezbûr da kendi mâlıyla ve kendisi için menzil-i merkūmu ondan iştirâ etti. Vâki‘ ikrâr, müşterî-i merkūm kıbelinden tasdîka vekâleti Derviş Efendi b. Şükrullah ve Mehmed Efendi b. Bâli’nin şehâdetleri ile sâbit olan Mehmed Ağa b. Ferhad tarafından tasdîk edildi. Cerâ zâlike ve hurrire fî evâsıtı Cumâdelûlâ sene selâse ve erba‘în ve elf. Şuhûdü’l-hâl: Çavuşzâde Ahmed Efendi, Yusuf Halîfe b. Ramazan el-Müezzin, Hasan Bey b. Abdullah el-Cündî, Kurd Çelebi b. Abdi el-Müezzin, Ali Çelebi b. Odabaşı, Mehmed Çelebi b. Ahmed, Mehmed Beşe b. Abdullah er-Râcil, Halil Bey b. Mehmed el-Cündî