Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 268 Hüküm no: 287 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf arsanın bina yapmak üzre icâreteyn yoluyla Hüseyin b. Cafer’e kiralandığı Mahmiye-i İstanbul’da Şah Nisâ Hâtun Vakfı’na hâlâ mütevellî olan Hüsam Halîfe b. Hanefi nâm kimesne meclis-i şer‘-i şerîfde, işbu râfi‘ü’l-kitâb Hüseyin b. Cafer nâm kimesne mahzarında ikrâr ve takrîr-i kelâm eyleyip, vakf-ı mezbûrdan mahmiye-i merkūmede Hüsam Bey mahallesinde vâki‘ bir tarafı İbrahim Ağa b. ( ) mülkü ve bir tarafı su kemeri ve bir tarafı Müezzinzâde Vakfı ve bir tarafı tarîk-i âm ile mahdûd tûlen yirmi üç zirâ‘ ve arzan yedi zirâ‘ hesâb-ı şatrancî üzre yüz altmış zirâ‘ arsa üzerinde vâki‘ fevkānî ve tahtânî iki bâb odalar icâre-i mu‘accele ve yevmî bir akçe ücret-i müeccele ile el-Hâc Hurrem b. ( ) nâm kimesnenin taht-ı icâresinde iken hâlâ vâki‘ harîk-i azîmde muhterik olup ve mezbûr el-Hâc Hurrem arsa-i merkūme üzerine mâlıyla binâya rağbet etmeyip ve cânib-i vakıfda binâya müsâ‘ade olmamağın arsa-i merkūme ecr-i misil ile âhara îcâr için tâlibîne arz ve müzâyede olundukda yedi bin akçe icâre-i mu‘accele ve ücret-i müeccele-i mezkûre ile mezbûr Hüseyin üzerinde karâr etmeğin arsa-i mezbûreyi vech-i meşrûh üzre ücreteyn-i merkūmeteyn ile târih-i kitâb gününden mezkûr Hüseyin’e îcâr eyleyip, ol dahi istîcâr ve kabûlden sonra ücret-i mu‘accele-i mezbûr yedi bin akçeyi vakf için yedinden alıp kabz eyleyip ve mâlından harc ve sarf eylediği meblağ icâre-i mu‘accele-i mezkûreye zam ve ilhâk olunmak üzre binâya mezkûr Hüseyin’e izin verdim. Ba‘de’l-yevm ta‘yîn olunan ücret-i yevmiyesini mâh be mâh cânib-i vakfa edâ eyleyip emsâli gibi mutasarrıf olsun dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min Cemâziyelevvel li sene selâsin ve erba‘în ve elf. Şuhûdü’l-hâl: Mehmed b. Şaban, el-Hâc İvaz b. ( ), Hasan Çelebi b. ( ), Hüsrev b. Abdullah, Hasan b. Abdullah, Mustafa b. Abdullah.