Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 269 Hüküm no: 288 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aişe adlı küçük kıza ait icâreteynli vakıf arsanın Mustafa Beşe’ye devredildiği Mahmiye-i Kostantıniyye’de Sarıgerz kurbunda Çıkrıkçı Kemal mahallesinde bundan akdem müteveffâ olan es-Seyyid Sadeddin Çelebi b. es-Seyyid Zeyneddin nâm kimesnenin li-ebeveyn ammi ve sulbiye kızı Aişe nâm sagīrenin men lehü’n-nasb olan hâkim kıbelinden vasîsi olan es-Seyyid Hüseyin Çelebi b. Abdülcemil nâm kimesne meclis-i şer‘-i hatîr-i lâzımü’t-tevkīrde, dergâh yeniçerilerinden işbu hâfızu’l-kitâb fahrü’l-emâsil ve’l-eşbâh Mustafa Beşe b. Abdullah nâm odabaşı mahzarında bi’l-vesâye ikrâr ve takrîr-i kelâm edip Haremeyn-i şerîfeyn evkāfından mahalle-i merkūmede vâki‘ muhavvata-i dâhiliyesi üç beyt-i ulvîyi ve bir sofayı ve bir matbahı ve kileri ve bi’r-i mâyı ve kenîfi muhtevî olup ve muhavvata-i hâriciyesi bir beyt-i ulvîyi ve bir şehnişîni ve dehlizi ve ahırı ve kenîfi müştemil olup, bir tarafı Zağarcıbaşı Ali Ağa mülkü ve bir tarafı Ali Beşe b. Abdullah er-Râcil mülkü ve bir tarafı Şah Efendi odaları ve bir tarafı tarîk-i âm ile mahdûd olan menzil bundan akdem ücret-i mu‘accele ve mâh be mâh kırk beşer akçe icâre-i müeccele ile mezbûr es-Seyyid Sadeddin Çelebi’nin yedinde ve taht-ı tasarrufunda olup ba‘de vefâtihî intikāl-i âdî ile sulbiye kızı sagīre-i merkūmeye intikāl etmiş iken bi irâdeti’llâhi te‘âlâ vâki‘ olan harîkde bi’l-külliye muhterik olup bir vechile kābil-i süknâ olmayıp ve müceddeden binâ olunduğu takdîrce harcı gallesinden ziyâde olup sagīreye nef‘i olmamakla arsası bedel-i tefvîz ile âhara verilip bedel-i merkūm sagīre-i mersûme için hıfz ve zabt olunmak min külli’l-vücûh sagīre-i merkūme hakkında nâfi‘ olmağın, bundan akdem izn-i hâkimü’ş-şer‘le kirâren ve mirâren mecâlis-i tâlibînde nidâ ve müzâyede olunup ragabât-ı nâs münkatı‘a olup mezbûr Mustafa Beşe’nin üzerinde on beş bin akçe bedel-i mu‘ayyende karâr edip bir akçe ziyâde ile âhar tâlibi olmadığından mâ‘adâ savb-ı şer‘den nâib ve mi‘mâr irsâl olunup ahâlî-i vukūf ile varıp mu‘âyene ve müşâhede ettiklerinde, bedel-i merkūm arsa-i mersûmenin her vechile bedel-i mislidir deyü icmâ‘ ve ittifâk ettikleri ecilden ben dahi vesâyet-i mahkiyyem hasebi ile arsa-i merkūmenin hakk-ı tasarrufunu mütevellî-i vakf-ı merkūm olan Mustafa nâm kimesne ma‘rifetiyle merkūm Mustafa Beşe’ye bedel-i merkūm mukābelesinde tefvîz ve teslîm eylediğimde, mezbûr dahi vech-i meşrûh üzre tefevvuz ve kabûl eyledikden sonra bedel-i tefvîzi olan sâlifü’z-zikr on beş bin akçeyi bi’t-tamâm ve’l-kemâl yedinden alıp kabz eyledim dedikde vasîyy-i merkūm es-Seyyid Hüseyin Çelebi’yi kelimât-ı meşrûhasında mezbûr Mustafa Beşe dahi bi’l-muvâcehe tasdîk ve minvâl-i muharrer üzre tefevvuz ve kabûl eylediğini tahkīk edicek mâ vaka‘a bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: Ahmed Efendi b. ( ), İbrahim Çavuş b. Muzaffer, Mustafa Efendi b. Abdullah el-Kâtib, Osman Çelebi b. Ömer el-İmâm, es-Seyyid Hüseyin Efendi b. Ali, Mehmed b. Mustafa, Abdullah b. Mehmed el-Müezzin, Yusuf Dayı el-bevvâb, Hüseyin b. Bayezid el-Hayyât, Halil Beşe b. ( ) er-Râcil, Üstâd İbrahim el-Hayyât.