Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 285 Hüküm no: 310 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Nesimi’nin Rahime Hatun’un vekili olduğu Diyâr-ı şarkiyyede vâki‘ medîne-i Musul mahallâtından Circis Peygamber mahallesi ahâlîsinden olup bundan akdem müteveffâ olan Hüseyin Çelebi b. Cemaleddin el-Bağdâdî’nin sulbiye kızı olup mahalle-i merkūmede sâkine olan Rahime nâm hâtun tarafından âti’z-zikr olan bir bâb vakıf menzil ile bir bâb dükkânın hakk-ı tasarrufunu tefvîze ve bedel-i tefvîzi kabza vekîl olan Ali Bey b. Nesimî nâm kimesne meclis-i şer‘de, işbu hâfızu’l-kitâb Mehmed Çavuş b. Abdullah nâm mahzarında bi’l-vekâle ikrâr ve takrîr-i kelâm edip, mahmiyye-i Kostantıniyye’de merhûm Mehmed Paşa-yı Velî Vakfı’ndan merhûm-ı müşârunileyhin câmi‘-i şerîfi mahallesinde hamam mukābelesinde Acıçeşme üzerinde vâki‘ müte’ehhil odalarından olup mâh be mâh kırk beş akçe icâre-i müeccelesi olan ma‘lûmü’l-hudûd olan bir bâb berber dükkânı bundan akdem ücret-i mu‘accele ve mâh be mâh seksen akçe icâre-i müeccele ile merkūm Hüseyin Çelebi’nin yedinde ve taht-ı tasarrufunda olup, ba‘de vefâtihî bi hasebi’l-kānûn sulbiye kızı müvekkile-i merkūme Rahime Hâtun’a intikāl eyledikde, merkūme Rahime Hâtun dahi zikr olunan üç bâb odanın bir bâb berber dükkânının hakk-ı tasarrufunu bedel-i mu‘ayyen mukābelesinde tefvîz ve teslîm ve bedel-i merkūmu ahz ve kabza beni nâib-i menâb nasb etmekle, ben dahi gelip zikr olunan üç bâb oda ve bir bâb berber dükkânının hakk-ı tasarrufunu mütevellî-i vakf-ı merkūm olan İbrahim nâm kimesne ma‘rifetiyle mezbûr Mehmed Çavuş’a yüz yirmi beş bin akçe bedel-i mu‘accel mukābelesinde bi’l-vekâle tefvîz eylediğimde, mezbûr Mehmed Çavuş dahi vech-i meşrûh üzre tefevvuz ve kabûl eyledikden sonra bedel-i tefvîz olan sâlifü’z-zikr yüz yirmi beş bin akçeyi bi’t-tamâm ve’l-kemâl bana teslîm eyledi dedikde, mukırr-ı merkūm Ali Bey’i kelimât-ı meşrûhasında merkūm Mehmed Çavuş dahi bi’l-muvâcehe tasdîk ve vech-i muharrer üzre zikr olunan üç bâb oda ve bir bâb dükkânını bedel-i merkūm mukābelesinde tefevvuz ve kabûl edip bedel-i merkūmu bi’t-tamâm teslîm eylediğini tahkīk eyledikden sonra vekîl-i merkūm Ali Bey zikr olunan üç bâb oda ve bir bâb berber dükkânını merkūm Mehmed Çavuş’a teslîm murâd eyledikde, merkūm Mehmed Çavuş takrîr-i kelâm edip eğerçi merkūm Ali Bey zikr olunan üç bâb oda ve bir bâb berber dükkânının hakk-ı tasarrufunu merkūme Rahime Hâtun tarafından tefvîz ve teslîm ve bedelini kabza vekîl ve bu bedel-i merkūm mukābelesinde tefvîz etmekle ben dahi tefevvuz edip bedel-i merkūmu teslîm eyledim. Lâkin mezbûr Ali Bey’in vekâleti şer‘an sâbite olmamıştır deyü kabzdan imtinâ‘ edicek, gıbbe’l-istişhâd udûl-i Müslimîn’den merkūme Rahime Hâtun’un zâtını ma‘rifet-i şer‘iyye ile ârifân olup medîne-i merkūmede zikr olunan Circis Peygamber mahallesi ahâlîsinden olan Mehmed b. Kasım ve İmâm Avdeddin? mahallesi ahâlîsinden olan Kara Ahmed b. Mehmed Çavuş nâm kimesne li ecli’ş-şehâde hâzırân olup, fi’l-vâki‘ merkūme Rahime Hâtun zikr olunan üç bâb oda ve bir bâb berber dükkânının hakk-ı tasarrufunu bedel-i mu‘ayyen ile tefvîz eylemeye ve bedel-i tefevvuzü ahz ve kabza merkūm Ali Bey’i bizim huzûrumuzda vekîl ve nâib-i menâb nasb eyledi idi. Bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, ba‘de ri‘âyet-i şerâiti’l-kabûl şehâdetleri makbûle olup mûcebiyle sıhhat-i vekâlet-i merkūmeye hükm ve mezbûr Mehmed Çavuş zikr olunan üç bâb oda ve bir bâb berber dükkânını kabza emr olunup, mâ hüve vaka‘a bi’t-taleb ketb olundu. Tahrîren fî evâsıtı şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Ali Efendi b. Ahmed el-müteferrika, Ramazan b. Osman min mahalle-i Kestel, Hasan b. Abdullah min mahalle-i Muhtesib Karagöz, el-Hâc Yusuf b. Abdullah min mahalleti’l-merkūme, Osman b. el-Hâc (…) [Mansur?] min mahalle-i Hoşkadem, Nasrullah b. Cemaleddin min mahalleti’l-merkūme, Süleyman b. Abdullah min mahalle-i Hoşkadem, Yusuf Bey b. Abdullah min mahalle-i Kurşunlu, Ali Çelebi b. Hamza el-ma‘rûf bi Mehterzâde, es-Seyyid Mehmed Çavuş b. Şaban, Yahya b. Mahmud el-Hatîb.