Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 293 Hüküm no: 316 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin evini Mustafa Çavuş b. Hüseyin’e sattığı Mahrûse-i Edirne ahâlîsinden Kemal Bey demekle ma‘rûf merhûm Ahmed Ağa’nın sulbî oğlu Mustafa Çelebi nâm kimesne mahfil-i kazâda hâlâ eyâlet-i Budin muhâfazasına me’mûr olan vezîr-i mükerrem Musa Paşa’nın kethüdâsı râfi‘ü’l-kitâb fahrü’l-a‘yân Mustafa Çavuş b. Hüseyin nâm kimesne mahzarında ikrâr ve takrîr-i kelâm eyleyip, bi’l-fi‘il silk-i mülk-i sahîhimde dâhil olup, mahmiye-i İstanbul’da Lâleli Çeşme demekle ma‘rûf ayn-ı câriye kurbunda vâki‘ tarafeyni Ferhad Paşa Sarayı ve bir tarafı mahalle-i mezbûre mescidi duvarı ve bir tarafı tarîk-i âm ile mahdûd ve muhavvatayı müştemil olup muhavvata-i dâhiliyesi iki bâb beyt-i ulvî ve bir sofa ve kenîf ve mukābelesinde iki beyt-i ulvî ve iki sofa ve kiler ve hücre ve matbah ve fırın ve hadîkası ve hâriciyesi dört bâb büyût-ı fevkāniye ve iki sofa ve kenîf ve ıstabl ve mahzen ve hücre-i tahtâniye ve anbar ve muhavvata-i yesîreyi muhtevî olan menzili, cemî‘ tevâbi‘ ve levâhıkıyla müşârunileyh Mustafa Çavuş’a iki yüz yirmi bin fıddî ve râyicü’l-vakt akçeye bey‘-i bât-ı sahîh-i şer‘î ile bey‘ ve teslîm eyleyip ol dahi vech-i meşrûh üzre iştirâ ve tesellümden sonra semeni olan meblağ-ı mezbûr iki yüz yirmi bin mezkûru’l-vasf akçeyi yedinden bi’t-tamâm ahz ve kabz eyledim. Ba‘de’l-yevm menzil-i mahdûd-ı mezkûr mesfûr Mustafa Çavuş’un mülk-i müşterâsıdır, keyfe mâ yeşâ ve yehtâr mutasarrıf [olsun] dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâhiri Cemâziyelevvel li sene selâsin ve erba‘în ve elf. Şuhûdü’l-hâl: Fahrü’l-meşâyihü’l-kirâm eş-Şeyh Osman Efendi b. Mustafa, es-Seyyid Yakub Efendi b. ( ) el-İmâm, Mustafa Ağa b. ( ), Mehmed Beşe b. ( ) korucu, el-Hâc Bayram b. ( ), İbrahim Çelebi b. ( ), diğer İbrahim Çelebi, Ahmed Çelebi b. İbrahim Çelebi, Hüseyin Bey b. İsmail Bey, Ahmed Çelebi, Şaban Çavuş b. Veli, Mehmed Efendi.