Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 293 Hüküm no: 317 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hatun bt. Hüseyin’in Mehmed Efendi b. Sinan’a ait olduğu anlaşılan evi bırakması Râfi‘ü’l-kitâb zahrü’l-vülât Mehmed Efendi b. Sinan nâm kimesne meclis-i şer‘-i şerîfde, mahmiye-i İstanbul’da Hoşkadem mahallesinde sâkine müdde‘iyye [menzil-i] âti’l-beyâna hâlâ vâzı‘atü’l-yed olduğu nehc-i şer‘î üzre sâbit olan Rahime Hâtun bt. Hüseyin tarafından husûs-ı âti’z-zikirde husûmet ve redd-i cevâba vekîl olup hasm-ı münkir mahzarında Mustafa Bey b. ( ) ve Abdülbâkī b. Mehmed şehâdetleri ile vekâleti sâbite olan fahrü’l-kuzât Abdülbâkī Efendi b. İbrahim nâm kimesne mahzarında üzerine da‘vâ eyleyip, mukaddemâ şarkda seferinde müteveffâ olan Çatalzâde merhûm Ahmed Paşa’nın muhallefâtından bi’l-inhisâr veresesi zevce-i metrûkesi mezkûre Rahime Hâtun’a ve sulbiye kebîre kızları Ümmühâni ve Hatice’ye ve li-ebeveyn karındaşı Edhem Efendi’ye intikāl eyleyip mahalle-i mezbûrede vâki‘ ma‘lûmü’l-hudûd olan menzil, alâ farazallâhü te‘âlâ verese-i mezkûre beynlerinde yirmi dört sehim olup üç sehimi zevcesi mezkûre Rahime Hâtun’a ve sekiz sehimi mezkûretân Ümmühâni ve Hatice’ye ve beş sehimi mesfûr Edhem Efendi’ye isâbet etmeğin, menzil-i mezbûr taleb ve rızâlarıyla iktisâm olundukda, dâhiliyesinde vâki‘ bir tarafı merkūme Rahime Hâtun’a ta‘yîn olunan hisse ve tarafeyni Osman Paşa Vakfı ve bir tarafı tarîk-i âm ile mahdûd üç bâb tahtânî ve iki bâb fevkānî oda ve kapı arasında bir bâb fevkānî oda ve sofa ve dehliz ve zîr-i zemîn ve bir hamam ve matbah ve bir musluk ve bir köşk ve bi’r-i mâ ve kenîf ve muhavvata-i dâhiliyesiyle beş yüz kırk dört zirâ‘ arz-ı hâliye mezbûretân Ümmühâni ve Hatice’ye isâbet eden sihâm-ı merkūme ta‘yîn ve tahsîs olundukdan sonra mezbûretân Ümmühâni ve Hatice vech-i meşrûh üzre mezkûr olan hisse-i mu‘ayyenelerini bana yüz yetmiş bin fıddî ve râyic akçeye bey‘ ve teslîm ve ba‘de’l-iştirâ kabz-ı semen etmekle mülk-i müşterâm olmuş iken zikr olunan büyût-ı tahtâniyenin tahtında vâki‘ menzil-i mezbûrdan merkūme Rahime Hâtun hissesine muttasıl olan zîr-i zemîne mezkûre Rahime Hâtun bi gayri vech-i şer‘î vaz‘-ı yed edip tasarruf eder, vekîl-i mesfûra suâl olunup bi hasebi’ş-şer‘i’ş-şerîf müvekkilesinin kasr-ı yedine tenbîh olunmak matlûbumdur dedikde, gıbbe’s-suâl vekîl-i mezkûr Abdülbâkī Efendi cevâbında, fi’l-vâki‘ tafsîl-i hâl minvâl-i meşrûh üzre olup lâkin menzil-i mezbûr verese-i mezkûre beynlerinde iktisâm olundukda, zikr olunan zîr-i zemîn merkūm Mehmed Efendi’nin bâliğaları olan merkūmetân Ümmühâni ve Hatice’nin sihâm-ı mezkûreleri için ta‘yîn ve tahsîs olunmamışdır deyü inkâr etmeğin, müdde‘î-i müşârunileyh Mehmed Efendi’den da‘vâsına muvâfıka beyyine taleb olundukda, hâssa mi‘mârlardan Hüsrev b. Abdullah ve el-Hâc Hasan b. Abdullah nâm kimesneler li ecli’ş-şehâde meclis-i şer‘e hâzırân olup gıbbe’l-istişhâdi’ş-şer‘î fi’l-vâki‘ müteveffâ-yı mesfûr Ahmed Paşa’nın muhallefâtından mahalle-i mezbûrede vâki‘ ma‘lûmü’l-hudûd olan menzil ber vech-i inhisâr veresesi mezkûrlar beynlerinde rızâlarıyla iktisâm olundukda, hudûd-ı mezkûre dâhilinde vâki‘ bâlâda beyân olunan büyût-ı tahtâniye tahtında olup, hâlâ müvekkile-i mezbûre vâzı‘atü’l-yed olduğu zîr-i zemîn mezkûretân Ümmühâni ve Hatice sihâmlarına ta‘yîn ve tahsîs olunup, hâlâ müdde‘î-i mesfûr Mehmed Efendi’nin şirâ-i şer‘iyye ile iştirâ olunmuş mülk-i mahzı ve hakk-ı sarîhidir. Biz bu husûsa bu vech üzre şâhidleriz şehâdet dahi ederiz deyüp edâ-i şehâdet-i şer‘iyye eylediklerinde, ba‘de’t-ta‘dîli’ş-şer‘î şehâdetleri makbûle olmağın, mûcebiyle zikr olunan zîr-i zemînden mezkûre Rahime Hâtun kasr-ı yed etmek üzre vekîli mesfûr Abdülbâkī Efendi’ye tenbîh-i şer‘î olunup, mâ hüve’l-vâki‘ bi’t-taleb ketb olundu. Tahrîren fî evâhiri Cemâziyelevvel li sene selâsin ve erba‘în ve elf. Şuhûdü’l-hâl: Mefharü’l-hutebâ el-Hâc Muharrem Efendi b. Sadık, İdris Efendi b. ( ) el-kadı, Receb Çelebi b. Osman el-kadı, Mehmed Çelebi b. Yusuf Halîfe, Yusuf Halîfe b. Mustafa el-Müezzin, Mehmed b. İsmail, Ali Çelebi b. Hamza el-İmâm, Ahmed Çelebi b. Yusuf er-Râcil, Hamza b. Receb, Abdülfettâh Efendi b. ( ) el-kadı, Mehmed Çelebi b. Sinan er-Râcil, Mustafa Çavuş el-Mübâşir, Fahrü’l-kuzât Abdurrahman Efendi b. el-merhûm Abdülkerim Efendi.