Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 41 Hüküm no: 2 Orijinal metin no: [1a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asodor v. Pali’nin menzil hissesini mühtedi kardeşi Şaban’a satışı Mahmiye-i İstanbul’da Langa kurbunda Çakır Ağa mahallesinde sâkin iken helâk olan Pali v. Şemse nâm zimmî Ermeninin verâseti zevce-i metrûkesi Hâtun bint-i Mardiros nâm Ermeniye ile sulbî oğlu olup helâkinden sonra şeref-i İslâm ile müşerref olan Şaban nâm mühtedîye ve diğer oğlu Asodor nâm Ermeni zimmîye münhasıra olup terekesini bi hasebi’t-tashîh on altı sehim i‘tibâr olunmağın, sihâm-ı mezbûreden iki sehimi mezbûre Hâtun’a ve yedişer sehimi merkūmân Şaban ve Asodor’a her birine isâbet eylediği şer‘an zâhir ve mütehakkık oldukdan sonra mezbûr Asodor meclis-i şer‘-i hatîr-i lâzımü’t-tevkīrde karındaşı işbu râfi‘ül-kitâb mezbûr Şaban mahzarında tav‘an ikrâr ve i‘tirâf edip mahalle-i mezbûrda vâki‘ bir tarafı Mustafa Ağa b. Abdülmennân mülküne ve bir tarafı Terzi Murat nâm zimmî mülküne ve bir tarafı Laskari v. Kosta mülküne ve bir tarafı tarîk-i âmma müntehî dört bâb fevkānî odayı ve üç bâb vüstâyî odayı ve bir bâb tahtânî odayı ve bir mahzeni ve bir su kuyusunu ve üç kenîfi müştemil cemî‘ menzil babam hâlik-i mezbûr Pali’nin mülkü ve hakkı olup ba‘de helâkihî irs-i şer‘î ile üçümüze intikāl etmiş idi. Hâlâ cemî‘ menzil-i mezbûrun on altı sehimden bana isâbet eden yedi sehim hissemi cümle hukūkuyla karındaşım mezbûr Şaban’a bin altı yüz riyâlî kuruşa bâtten bey‘ ve teslîm edip ol dahi minvâl-i meşrûh üzre iştirâ ve tesellüm eyledikden sonra semen-i merkūm bin altı yüz riyâlî kuruşdan altı yüzer riyâlî kuruşunu yedinden alıp kabz edip semen-i bâkī bin riyâlî kuruş[u] târih-i kitâbdan üç yüz altmış gün tamâmına değin te’cîl eyledim, ol dahi ecel-i merkūmu kabûl eyledi dedikleri, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Cumâdelûlâ sene 1059. Şuhûdü’l-hâl: Siyavuş Efendi b. Rıdvan el-imâm, Derviş Çelebi b. Abdülcelîl , Mustafa Halîfe b. Cafer.