Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 42 Hüküm no: 3 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İdam edilen Varvar Ali Paşa’nın Abdürrahim Ağa b. Mehmed Ağa’ya olan borcunun terekesinden ödenmesi Husûs-ı âti’l-beyânın mahallinde istimâ‘ı lâzım gelmeğin, bi’l-iltimâs hâkim-i muvakki‘-i kitâb tûbâ-lehû ve hüsnü me’âb dahi mahmiye-i İstanbul’da Emin Nureddin mahallesinde hâlâ çavuşbaşı olan umdetü’l-emâcid ve’l-ekârim Abdülfettâh Ağa çavuşbaşılık için ittihâz eylediği menzile varıp akd-i meclis-i şer‘-i şerîf eyledikde, mahmiye-i mezbûrede Cerrâh Câmi‘i kurbunda Kürkçübaşı mahallesinde sâkin Abdürrahim Ağa b. Mehmed Ağa meclis-i ma‘kūdda, bundan akdem eyâlet-i Rum’dan ma‘zûl olup katl olunan Varvar Ali Paşa b. Behram’ın sulbî kebîr oğlu ve vârisi olup terekesine vaz‘-ı yed eden Mustafa Bey nâm şâbb-ı âkil ve bâliğ mahzarında üzerine takrîr-i da‘vâ edip işbu Mustafa Bey’in babası ve mûrisi olan Varvar Ali Paşa zimmetinde cihet-i karz-ı şer‘îden bin riyâlî kuruş hakkım olup meblağ-ı mezkûrdan altı yüz riyâlî kuruşunu hâl-i sıhhat ve nefâz-ı tasarrufâtında ahz edip bâkī dört yüz riyâlî kuruş hakkım mezbûr Varvar Ali Paşa vefât edip zimmetinde kalmışdır, suâl olunup terekesinden alıverilmesin taleb ederim dedikde, gıbbe’s-suâl mezbûr Mustafa Bey husûs-ı mezbûru inkâr edicek, müdde‘î-i mezbûrdan da‘vâ-yı meşrûhasını mübeyyine beyyine taleb olundukda, udûl-i ahrâr-ı ricâl-i müslimînden olup mahmiye-i mezbûrede Molla Gürânî’de Molla Şeref mahallesinde sâkin Murtaza Bey b. Bekir ve Toptaşı kurbunda [sâkin] Hasan Çavuş b. Ömer nâm kimesneler li ecli’ş-şehâde meclis-i ma‘kūdda hâzırân olup gıbbe’l-istişhâd ve her biri şehâdet edip fi’l-hakīka işbu Mustafa Bey’in babası müteveffâ-yı mezbûr Varvar Ali Paşa işbu müdde‘î Abdürrahim Ağa’dan bizim huzûrumuzda bin riyâlî kuruş iktirâz ve kabz eyledi, altı yüz riyâlî kuruşunu hâl-i sıhhatinde edâ edip vefât etmeğin, bâkī dört yüz riyâlî kuruş zimmetinde işbu Abdürrahim Ağa’nın hakkı kalmağla terekesinden edâsı vâcibdir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde, gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı bâkī dört yüz riyâlî kuruşa dahi müteveffâ-yı mezbûr Varvar Ali Paşa’dan hâl-i hayâtında küllen veya ba‘zan asâleten veya vekâleten ahz u kabz eylemediğine veya âhara havâle olmadığına veya turuk-ı şer‘iyyeden bir tarîk ile zimmetini ibrâ eylemediğine yemîn teklîf olundukda, ol dahi hasbe’l-mes’ûl yemîn billâhi’l-aliyyi’l-azîm edicek, şehâdet-i mezbûre mûcebince meblağ-ı müdde‘â dört yüz riyâlî kuruşu tereke-i müteveffâ-yı mezbûrdan edâya şerâyit-i hükm-i şer‘î mer‘iyye olduğu hâlde hükm-i şer‘î ile hükm olunup mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min şehri Rebî‘ilevvel sene 1059. Şuhûdü’l-hâl: Cafer Çavuş b. Sefer, Ahmed Çavuş b. Bektaş Çavuş, Malkoç Ağa b. Osman, Mehmed Ağa b. Hasan ve gayruhüm.