Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 43 Hüküm no: 4 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin Bey b. Abdullah’ın kendisini yaralayan Mustafa Beşe b. Numan ile sulh olduğu Mahrûse-i Galata kazâsına tâbi‘ kasaba-i Beşiktaş’da Sinan Paşa mahallesinde sâkin Şahin Bey b. Abdullah nâm cündî meclis-i şer‘-i hatîrde, Dergâh-ı âlî yeniçerilerinin Altmış Birinci müteferrikalarından Mustafa Beşe b. Numan mahzarında tav‘an ikrâr ve i‘tirâf edip târih-i kitâba gelince dokuz gündür yevm-i ehadde Beşiktaş’da Zincirlikuyu kurbunda ba‘de’l-asr işbu Mustafa Beşe beni amden hançer ile sol küreğim üzerinden vurup mecrûh eylemekle, mezbûr Mustafa Beşe’den cerâhat-ı meşrûhayı da‘vâ eylediğimde, ol dahi inkâr edip beyyinem olmamağla beynimizde münâza‘ât-ı kesîre vâkı‘a olmuşdu. El-hâletü hâzihî beynimizde muslihûn tavassut edip cerâhat-ı mezbûre da‘vâsından an-inkâr, ücret-i tabîb ve kıymet-i merhem bin beş yüz fıddî-i cedîd akçe üzerine akd-i sulh inşâ eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr bin beş yüz akçeyi meclis-i sulhda merkūm Mustafa Beşe yedinden tamâmen ahz u kabz eyleyip cerâhat-ı mezbûre da‘vâsından mezbûr Mustafa Beşe’nin zimmetini ibrâ-i âm ile ibrâ ve iskāt eyledim. Min ba‘d husûs-ı mezbûra müte‘allika da‘vâ ve hakkım kalmadı dedikde, mukırr-ı mezbûr Şahin Bey’i ikrâr-ı meşrûhunda mezbûr Mustafa Beşe vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Hasan Ağa b. Veli tâbi‘-i Dilaver Paşa, Hüseyin Ağa b. Mustafa tâbi‘-i Dilaver Paşa, Ali Beşe b. Mehmed, Osman Bey b. Abdurrahman el-yesârî, Haydar Bey b. Abdullah, Yahya b. Zekeriya.