Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 44 Hüküm no: 5 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Musa’ya borcunu ödememekte inat eden Takyeci Menteş v. Mosi’nin hapsedilmesi Mahmiye-i İstanbul’da Hoca Gıyaseddin mahallesinde sâkin İbrahim Çelebi b. Musa meclis-i şer‘de, Sinori cemâ‘atinden olup mahmiye-i mezbûrede Tahtakale’de sâkin Takyeci Menteş v. Mosi nâm Yahudi muvâcehesinde üzerine takrîr-i da‘vâ edip işbu Menteş’e bundan akdem beş bin fıddî-i cedîd râyic fi’l-vakt akçe ikrâz ve teslîm eyledim, ol dahi iktirâz ve tesellüm ve mesârifine sarfla meblağ-ı mezbûr beş bin akçe zimmetinde hakkımdır edâda ta‘annü[d] eder suâl olunup alıverilmek taleb ederim dedikde, gıbbe’s-suâl mezbûr Menteş müdde‘î-i mezbûr İbrahim Çelebi’den vech-i meşrûh üzre beş bin cedîd akçe iktirâz ve kabz eyledim deyû zimmetinde deyn olduğunu tav‘an ikrâr ve i‘tirâf ve ba‘dehû edâda ta‘annüd edicek, meblağ-ı mezkûrun müdde‘î-i mezbûra edâsına mezkûr Menteş üzerine ilzâm olundukdan sonra li ecli’l-edâ kıbel-i şer‘-i kavîmden habsine emr olunup mâ vaka‘a bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel sene 1059. Şuhûdü’l-hâl: Ahmed Beşe b. Mehmed er-râcil, Sefer Beşe b. Ahmed mumcu, Ali Beşe b. Mehmed, Mustafa Beşe b. Numan, Ebîbekir Çelebi b. Ali Bey.