Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 48 Hüküm no: 11 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Burgos Kadısı İvaz Efendi b. İlyas’ın Halil Ağa b. Ali’ye borcu olduğu Vilâyet-i Anadolu’da Gördos ahâlîsinden olup Burgos ma‘a Kılcan kadısı olan İvaz Efendi b. İlyas meclis-i şer‘-i hatîr-i lâzımü’t-tevkīrde, işbu râfi‘ü’l-vesîka Halil Ağa b. Ali mahzarında bi’t-tav‘i’s-sâf ikrâr ve i‘tirâf edip merkūm Halil Ağa yedinden bundan akdem bir kıt‘a Edeb-i Kānûn kitâbını ve iki kıt‘a Ekmel kitâbını ve bir Mecma‘ü’l-Bahreyn kitâbını ve bir Şerh-i Şemsiye kitâbını ve bir mecmû‘asını ve bir Şâhidî kitâbını safka-i vâhide ile iki yüz yirmi beş kıt‘a riyâlî kuruşa bâtten iştirâ ve tesellüm eylediğimden sonra mezbûr Halil Ağa semen-i mezbûru târih-i kitâbdan doksan gün tamâmına değin te’cîl eylediğinden sonra hâlâ mezbûr Halil Ağa yedinden beş yüz kıt‘a riyâlî kuruş dahi iktirâz ve ahz u kabz edip mesârifime sarfla meblağ-ı mezbûr merkūm Halil Ağa’ya zimmetimde deyn olup semen-i mezbûr iki yüz yirmi beş riyâlî kuruş ve karz-ı şer‘îden dahi beş yüz riyâlî kuruş cem‘an yedi yüz yirmi beş kıt‘a riyâlî kuruş merkūm Halil Ağa’ya zimmetimde lâzımü’l-edâ ve vâcibü’l-kazâ deynimdir dedikde, mukırr-ı mezbûru ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk eylediğinden sonra meblağ-ı mezbûr yedi yüz yirmi beş riyâlî kuruşa mahmiye-i İstanbul’da Haydarhâne mahallesinde sâkin olup Bursa’dan ma‘zûl olan umdetü’l-mevâli’l-kirâm İdris Efendi hazretlerinin çukadârları Süleyman Beşe b. Mustafa ve yine mûmâ-ileyh İdris Efendi etbâ‘ından Hasan Çelebi b. İsmail ve Mustafa b. İsa ve Gördos ahâlîsinden Yahya Efendi b. İsa nâm kimesneler tarafeynden emr ve kabûlü hâviye kefâlet-i sahîha-i şer‘iyye ile kefîller olmağın, mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene 1059. Şuhûdü’l-hâl: Sunullah Efendi, Ahmed Çelebi, Mustafa Çelebi.