Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 48 Hüküm no: 12 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. İbrahim’in hırsızlık davasında Hüseyin b. Hasan ile sulh olduğu Mahmiye-i İstanbul’da vâki‘ merhûm Sinan Paşa Medresesi’nde sâkin olup zümre-i kuzâtdan Ahmed Efendi b. İbrahim meclis-i şer‘-i hatîr-i lâzımü’t-tevkīrde, işbu râfi‘ü’l-vesîka Hüseyin b. Hasan mahzarında bi’t-tav‘i’s-sâf ikrâr ve i‘tirâf edip bundan akdem medrese-i mezbûrede sâkin olduğum odam açılıp içinden bir Sadrü’ş-Şerî‘a kitâbım ve bir Dürer Gurer kitâbım ve bir Günyetü’l-Müftî kitâbım ve bir Câmi‘u’l-Fetâvâ kitâbım ve bir Bezzâziyye kitâbım ve bir Metn-i Ferâiz kitâbım ve bir Seyyid-i Ferâiz kitâbım ve bir Kudûrî kitâbım ve bir Kenz kitâbım ve bir Muhtâr Şerhi İhtiyâr kitâbım ve iki keten bezi mer[d]âne gömleğim ve iki keten bezi merdâne donum ve iki münakkaş makramam ve iki dokuma makramam ve bir mâî mukaddem kuşağım serika olundukda merkūm Hüseyin’e benim odamı sen açıp ve sâlifü’z-zikr eşyâmı sen serika eyledin deyû taleb ve da‘vâ eylediğimde, ol dahi inkâr etmekle beynimizde münâza‘ât-ı kesîre vâkı‘a olmuşdu. El-hâletü hâzihî beynimize muslihûn tavassut edip da‘vâ-yı mezbûremden beni merkūm Hüseyin ile an-inkâr on beş kıt‘a riyâlî kuruş üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr on beş kıt‘a riyâlî kuruşu meclis-i sulhda merkūm Hüseyin yedinden tamâmen ahz u kabz edip da‘vâ-yı mezbûremden berî olup husûs-ı mezbûra müte‘allika âmme-i da‘vâdan merkūm Hüseyin’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde, merkūm Hüseyin dahi meclis-i mezbûrda tav‘an ikrâr ve i‘tirâf edip benim dahi gelince hukūk-ı ma‘lûme ve hukūk-ı mechûleye müte‘allika merkūm Ahmed üzerine bi vechin mine’l-vücûh ve sebebin mine’l-esbâb da‘vâ ve nizâ‘ım yokdur dedikde, gıbbe’t-tesâdukı’ş-şer‘î mâ vaka‘a bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel li sene 1059. Şuhûdü’l-hâl: Müstakīm Çavuş b. Abdullah el-mübâşir, Veli Efendi b. ( ) el-kadı, Hasan Efendi b. Ramazan el-kadı, Mehmed Efendi el-müderris.