Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 54 Hüküm no: 40 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkaloğlu Tanaş’ın bağını oğlu Nikolaki’ye sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin Bakkāloğlu Tanaş v. Yorgi meclis-i şer‘-i hatîrde sulbî kebîr oğlu işbu râfi‘ü’r-rakīm Nikolaki zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup vakıf toprağımda vâki‘ bir tarafı Davidoğlu Tanaş bağı ve bir tarafı Ali Dayıoğlu tarlası ve bir tarafı Kel Bogos veresesi bağı ve bir tarafı tarîk-i âm ile mahdûd tahmînen altı dönüm kürûmî mülk bir kıt‘a çavuş bağımı tarafeynden îcâb ve kabûlü hâvî bey‘-i bâtt-ı sahîh-i şer‘î ile oğlum müşterî-i mezbûra iki yüz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve kabûl edüp semeni olan meblağ-ı mezkûr iki yüz guruşun mutâlebesine müte‘allıka âmme-i da‘vâdan oğlum merkūmun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâ-ba‘d bağ-ı mahdûd-ı mezkûrda benim kat‘â alâka ve medhalim kalmayup oğlum müşterî-i merkūm Nikolaki’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cemâziyelâhir li-sene semân ve seb‘în ve mi’ete ve elf. Şuhûdü’l-hâl: Kayseriyeli Mehmed Ağa, Osman Yazıcı, el-Hâc Mustafa Ağa, Süleyman Ağa b. İbrahim, Kasım Efendi, Ahmed Efendi. Ahar Yanaki, Ohan, Aci Mihail. İmamzâde Ahmed Efendi’nin hatemiyle mümzâ hüccetdir.