Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 50 Hüküm no: 14 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in alacaklı olduğu Dilaver Paşa b. Abdülmennân ile sulh olması Rakka Eyâleti’nde kasaba-i Haremlik sükkânından Ali b. Mehmed nâm kimesne meclis-i şer‘-i hatîr-i lâzımü’t-tevkīrde Canik Sancağı’ndan ma‘zûl emîrü’l-ümerâ’i’l-kirâm Dilaver Paşa b. Abdülmennân tarafından ikrâr-ı âti’l-beyânı tasdîka sâbitü’l-vekâle vekîli olan Hüseyin Bey b. Mustafa mahzarında tav‘an ikrâr ve takrîr-i kelâm edip mûmâ-ileyh Dilaver Paşa sâbıkan eyâlet-i mezbûreyi mutasarrıf iken beni mu’âhaze ve habs edip oğlun Ahmed nâ-mahremin menziline girdi deyû yedimden altmış riyâlî kuruş ve beş yaşında yüz riyâlî kuruş kıymetli bir doru atımı ve beş kuruş kıymetli bir mücessem Şamî harîr kuşağımı ve on kuruş kıymetli bir pencik ve kırk riyâlî kuruş kıymetli bir merdâne yeşil ferâcemi nâ-hak ahz edip meblağ-ı mezbûr altmış riyâlî kuruş hakkımı ve eşyâ-yı merkūmeyi merkūm Dilaver Paşa’dan taleb ve da‘vâ eylediğimde vermede ta‘annüd edip inkâr etmekle, beynimizde münâza‘ât-ı kesîre vâkı‘a olmuşdu. El-hâletü hâzihî beynimize muslihûn tavassut edip beni mûmâ-ileyh Paşa ile yirmi riyâlî kuruş üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr yirmi riyâlî kuruş mezbûr Dilaver Paşa’nın yedinden tamâmen alıp kabz edip meblağ-ı mezbûr ve eşyâ-i mezbûre da‘vâsından ve târih-i kitâba gelince cemî‘ de‘âvîden merkūm Dilaver Paşa’nın zimmetini ibrâ-i âmm-ı kātı‘ü’n-nizâ‘la ibrâ eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene 1059. Şuhûdü’l-hâl: Fahrü’l-akrân Abdülbâkī Ağa b. Mehmed çavuşbaşı, Mehmed Bey b. Salih, Ahmed Çavuş b. Abbas, Mehmed Çelebi b. Musa.