Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 56 Hüküm no: 22 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Mahmud Bey’in talebi üzerine babalarından kalan menzilin kardeşi Hatice ile arasında taksim olunduğu Mahmiye-i İstanbul’da Haydarhâne mahallesinde sâkine fahrü’l-muhadderât bâ‘isetü hâze’l-kitâb Emine Hâtun bt. Mahmud Bey’in husûs-ı âti’z-zikre tarafından vekîl-i müsecceli olan fahrü’l-akrân Mehmed Odabaşı b. Hasan meclis-i şer‘-i hatîr-i lâzımü’t-tevkīrde takrîr-i kelâm edip mahalle-i mezbûrede vâki‘ iki tarafdan a‘lemü’l-ulemâ’i’l-izâm Kara Çelebizâde Mahmud Efendi mülkü ve bir tarafı Kadızâde Mehmed Efendi mülkü ve bir tarafı tarîk-i âm ile mahdûd olan menzil, müvekkile-i mezbûre Emine Hâtun’un babası mezbûr Mahmud Bey’in mülkü olup vefât ettikde verâseti sulbiye kebîre kızı mezbûre Emine Hâtun ile diğer kebîre kızı Hatice nâm hâtuna münhasıra olmakla, menzil-i mezbûr irsen alâ tarîki’l-münâsafa mezbûretâna intikāl etmeğin cânib-i şer‘den üzerine nâib ve muhammin irsâl olunup vekâlet-i mahkiyem hasebiyle menzil-i mezbûr[u] vech-i muharrer üzre beynlerinde tevzî‘ ve taksîm ve her birinin hisseleri tavzîh ve ta‘yîn olunmak taleb ederim dedikde, savb-ı şer‘den Mevlânâ Abdüsselâm Efendi b. Mehmed ve hâssa mi‘mârlardan Üstâd Mehmed b. Abdullah ve Ahmed b. Abdullah irsâl olunup onlar dahi zeyl-i hüccetde mastûrü’l-esâmî olup ebniye ve sukūf ahvâline kemâl-i vukūfu olan bî-garaz müslimîn ile menzil-i mezbûra varıp mezkûre Hatice Hâtun’un zevci ve husûs-ı mezbûra vekîl-i sâbitü’l-vekâlesi olan fahrü’l-akrân Mustafa Ağa b. Süleyman mahzarında akd-i meclis olundukda, mi‘mârân-ı mezbûrân menzil-i mezbûrun dâhiliye ve hâriciyesi vech-i meşrûh üzre alâ tarîki’l-münâsafe mesâha ve tahmîn-i sahîh ile tahmîn ettiklerinde, muhavvata-i dâhiliyede müşârun-ileyh Mahmud Efendi mülkü tarafından vâki‘ tûlen ve arzan bi hesâb-ı şatrancî iki yüz sekiz zirâ‘ arsa üzerinde vâki‘ tahtânî ve fevkānî iki bâb menzil ve bir sofa ve matbah ve nerdübân ile ve hâriciyede kezâlik müşârun-ileyh Mahmud Efendi mülkü tarafında vâki‘ bir fevkānî ocaklı oda ve sofa ve ahûr zikr olunan ahûru kendi mâlı ile sokak kapısı ve dâhiliyesi binâ olunmak üzre bir hisseye isâbet edip ve kezâlik muhavvata-i dâhiliyede müşârun-ileyh Kadızâde Mehmed Efendi mülkü tarafında vâki‘ tûlen ve arzan bi hesâb-ı mezbûr iki yüz sekiz zirâ‘ arsa üzerinde vâki‘ tahtânî ve fevkānî iki bâb menzil ve sofa ve tahtânî ve fevkānî iki kenîf ve bir su kuyusu ile ve hâriciyede kezâlik müşârun-ileyhin menzili tarafında vâki‘ bir bâb fevkānî şehnişînli ocaksız oda ve nerdübân ve su kuyusu ve dâhiliye ve hâriciye kapılarıyla bir hisseye isâbet eylediğini mi‘mârân-ı mezbûrân haber verdiklerinde, hâzır olan müslimîn dahi vech-i meşrûh üzre mi‘mârân-ı mezbûrânın ihbârını telakkī bi’l-kabûl ettiklerinden sonra iştirâk-i seviyy üzre mâbeynlerine dolma duvar binâ etmek için vech-i meşrûh üzre alâmet vaz‘ olundukda, vekîl-i mezkûr Mustafa Ağa müşârun-ileyh Mahmud Efendi mülkü tarafında dâhiliye ve hâriciyede vâki‘ zikri mürûr eden fevkānî ve tahtânî üç bâb evleri ve iki sofa ve ahûr ve matbah ve nerdübânı müştemil nısf hisse-i mu‘ayyeneyi müvekkilesi mezbûre Hatice Hâtun için âharın rızâsıyla kabûl ve kabz edip ve vekîl-i mesfûr Mehmed Odabaşı dahi müşârun-ileyh Kadızâde Mehmed Efendi mülkü tarafında kezâlik tahtânî ve fevkānî üç bâb evleri ve bir sofa ve iki kenîf ve nerdübân ve iki su kuyusunu ve dâhiliye ve hâriciye kuyularını müştemil nısf hisse-i mu‘ayyeneyi, müvekkilesi mezbûre Emine Hâtun’a isâbet eden nısf hisse-i mu‘ayyene-i mezkûrede mârrü’z-zikr ahûr içinde vâki‘ taksîm-i mezkûrdan hâric olan kârgîr sagīr mahzeni dahi tarafeynden iştirâk üzre tasarrufa vekîlân-ı mezbûrânın terâzî ettiklerini mevlânâ-yı mezbûr mahallinde tahrîr edip huddâm-ı mahkemeden ma‘an irsâl olunan Abdünnebi b. İbrahim ve Osman b. Abdullah ile meclis-i şer‘a gelip vukū‘u üzre inhâ ve takrîr etmeğin, vâki‘-i hâl vekîl-i mezbûr Mehmed Odabaşı talebi ile ketb olunup yedine vaz‘ olundu. Tahrîren fi’l-yevmi’s-sâdis ve’l-aşer min Zilhicceti’ş-şerîfe sene 1057. Şuhûdü’l-hâl: İbrahim Çavuş b. Rıdvan mübâşir, Yusuf Çelebi b. Abdullah, Mehmed Çelebi b. Hamza, Ali Efendi b. ( ) imâm.