Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 58 Hüküm no: 23 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Poliharon v. Todori’nin Galata eski voyvodası Mehmed Ağa b. Abdurrahman’dan alacak davasının reddi Mahmiye-i İstanbul hısnı ebvâbından Kumkapı hâricinde meyhâneci tâifesinden Poliharon v. Todori nâm zimmî meclis-i şer‘-i hatîr-i lâzımü’t-tevkīrde, sâbıkan Galata voyvodası ve Kefe beyi beytülmâl emîni olan işbu râfi‘ül-kitâb mefharü’l-akrân Mehmed Ağa b. Abdurrahman muvâcehesinde üzerine da‘vâ ve takrîr-i kelâm edip bundan akdem bin elli sekiz Saferi’nde ecîr olan Yani v. ( ) nâm zimmî Akdeniz’den Franko v. Agosto nâm zimmî Reis sefînesine kanca ta‘bîr olunur üç fıçıda iki yüz elli müdre mülk ve hakkım olan hamrımı ve yine üç fıçıda yüz kırk müdre arakımı tahmîl edip Gelibolu’da Yediocak Deresi’ne geldikde ecîrim olan mezbûr Yani mürd oldukda, reis-i mezkûr Franko mahrûse-i Galata İskelesi’ne gelip sefînesini yanaşdırdıkda, işbu Mehmed Ağa zikr olunan hamrın nısfını ve arakın nısfını nâ-hak ahz eylemişdir, suâl olunup bana red olunmasın taleb eder[im] dedikde, gıbbe’s-suâl merkūm Mehmed Ağa cevâbında, mürd olan Yani işbu müdde‘î Poliharon ile şerîkler olup zikr olunan hamr ve arakın nısfı ve mezbûrun mülk ve hakkı ve terekesi olup vârisi olmayıp ben mahrûse-i Galata’da emîn-i beytülmâl olmağla bi hasebi’l-emâne zikr olunan hamr ve arakın nısfı taraf-ı beytülmâl için ahz u kabz eyledim. Hattâ mesfûr Poliharon’u bin elli sekiz şehr-i Rebî‘ulâhiri’nin yirmi yedinci günü Rumeli kazaskeri olan [Bâlizâde’nin şer‘iyyâtcısı Mevlânâ Ahmed Efendi huzûrunda], üç fıçıda iki yüz elli müdre hamrı ve üç fıçıda yüz kırk müdre arakı mezkûr Franko Reis sefînesiyle mahrûse-i Galata İskelesi’ne getirdiğinde, zikr olunan hamrın nısfını ve öşrün nısfı ve arakın nısfı benim ve nısfı hâlik-i mezbûr Yani’nindir ve Yani benim şerîkimdir deyû mezkûr Franko Reis üzerine da‘vâ eylemişdir deyû bu cihetle cümle hamr ve arak benimdir deyû da‘vâ eyledi da‘vâsına mutâbık [beyine talep] edicek, gıbbe’l-istintâk-ı şer‘î mesfûr Poliharon’u minvâl-i meşrûh üzre da‘vâ-yı şirket ve nısf eylediğini inkâr edicek, emîn-i merkūm Mehmed Ağa’dan def‘-i meşrûhunu mübeyyine beyyine taleb olundukda, udûl-i ahrâr-ı ricâl-i müslimînden Ali Bey b. Ahmed ve Ahmed Çelebi b. Abdurrahman nâm kimesneler meclis-i şer‘-i hatîrde li ecli’ş-şehâde hâzırân olup gıbbe’l-istişhâd her biri şehâdet edip fi’l-hakīka işbu Poliharon’u sâbıkan Rumeli kazaskeri olan Bâlizâde’nin şer‘iyyâtcısı Mevlânâ Ahmed Efendi huzûrunda mezkûr Franko Reis sefînesine yalnız mezbûr Yani tahmîl eylediği üç fıçıda iki yüz elli müdre hamrın nısfı ve üç fıçıda yüz kırk müdre arakın nısfı şerîkim olan hâlik-i mezbûr Yani’nindir ve nısf-ı âharı benimdir deyû mezkûr Franko üzerine da‘vâ eyledi, bu vechile cümle hamr ve arak benimdir deyû eylediği da‘vâsından işbu Poliharon’u mubtıldır, biz bu husûsa şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle oldukdan sonra şehâdet-i mezbûre mûcebince mesfûr Poliharon da‘vâ-yı meşrûhasından men‘ olundu, mâ hüve’l-vâki‘ bi’t-taleb ketb olundu. Hurrire fi’l-yevmi ( ) [min] Rebî‘ilevvel li sene tis‘a ve hamsîn ve elf. Şuhûdü’l-hâl: Fahrü’l-a‘yân Sipâhi Mehmed Ağa b. Abdülkerim, Ebûbekir Bey b. Musli, el-Hâc Mahmud Bey b. Ali, Camcı Mustafa Beşe b. Ramazan, Sunullah Efendi b. Ebûbekir, Osman Efendi b. Mehmed el-kâtib, Yahya Bey [b.] Zekeriya.