Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 59 Hüküm no: 24 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin ölen Ali Beşe b. Mehmed’de olan alacağında kefilin zimmetini ibra ettiği Mahmiye-i İstanbul’da Lâ[le]li çeşme kurbunda Ahmed Ağa mahallesinde sâkin Ahmed b. Ali nâm kimesne meclis-i şerîfde, bundan [akdem] mahalle-i mezbûrede vefât eden Ali Beşe b. Mehmed’in li ebeveyn karındaşı ve bi’l-inhisâr vârisi olup terekesine vaz‘-ı yed eden işbu râfi‘u’l-[kitâb] Osman Beşe b. Mehmed nâm râcil mahzarında tav‘an ikrâr ve takrîr-i kelâm edip müteveffâ-yı mezbûr Ali Beşe’ye hâl-i hayâtında ve nefâz-ı tasarrufâtında Teke Sancağı’nda Kaş nâm kasabada mahmiye-i İstanbul’da Bostancılar’dan Okçubaşı Ahmed Ağa’ya ittisâl için bi addi’s-sahîh yüz kıt‘a riyâlî kuruş def‘ ve teslîm eyledim, ol dahi yedimden minvâl-i meşrûh üzre ahz u kabz edip kable’t-teslîm mücehhelen vefât etmeğin muhallefâtına vaz‘-ı yed eden karındaşı ve vârisi mezbûr Osman Beşe’den da‘vâ ve taleb edip ba‘de’l-inkâr beyyine-i âdile ile meblağ-ı mezkûru mezbûr Osman Beşe muvâcehesinde huzûr-ı hâkimde isbât edip meblağ-ı mezbûrun edâsı muhallefât-ı müteveffâ-yı mezbûrdan hükm olunmuşdu. Hâlâ meblağ-ı mahkûmun-bih yüz riyâlî kuruş hakkın altmış riyâlî kuruşunu mezbûr Osman Beşe’nin yedinden tamâmen alıp kabz edip bâkī kırk riyâlî kuruşdan mezbûr Osman Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Bostan Beşe b. Abdullah, Süleyman, Mumcu Mustafa Beşe b. İsmail, İbrahim b. Sinan.