Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 62 Hüküm no: 29 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîrî Halife b. Ahmed’in miras hususunda Mustafa Bey b. Ali ile sulh olduğu Mahrûse-i Galata kazâsına tâbi‘ İstinye nâhiyesinde Boğazkesen Kal‘ası’nda Şah Mehmed el-Fenarî mahallesinde sâkine iken bundan akdem vefât eden Cenane bt. Abdullah’ın verâseti, zevc-i metrûku Ahmed Bey b. Abdullah’a ve mevlâ-yı utekāsı oğlu olup mukābele hulefâsından Pîrî Halîfe b. Ahmed Efendi’ye münhasıra olup ba‘dehû mezbûr Ahmed Bey dahi vefât edip verâseti li ebeveyn karındaşı oğlu Mustafa Bey b. Ali’ye münhasıra olduğu şer‘an mütehakkık oldukdan sonra mezbûr Pîrî Halîfe meclis-i şer‘-i hatîrde, merkūm Mustafa Bey mahzarında tav‘an ikrâr ve i‘tirâf edip mahalle-i mezkûre mescidinde vâki‘ ve bir tarafı İmâmzâde Mustafa Çelebi b. ( ) mülküne ve bir tarafı ba‘zan mahalle-i mezkûre mescidine ve ba‘zan ve bir tarafı kayalığa ve bir tarafı tarîk-i âmma müntehî bir bâb fevkānî ve iki bâb tahtânî odaları ve kapı üzerinde bir odayı ve bahçeyi ve kenîfi müştemil cemî‘ menzil-i mezkûr ve müteveffât-ı mezbûrenin sâir tereke-i menkūlesinin cemî‘ine mezbûr Mustafa Bey vaz‘-ı yed eyledikde zikr olunan menzilden ve sâir menkūle-i ma‘lûmesinde bana isâbet eden nısf hisse-i şer‘iyyenin mukābelesinde mezbûr Mustafa Bey benimle yüz elli riyâlî kuruş üzerine şerâyit-i sulhu hâvî şürût-ı müfsideden ârî sulh-ı sahîh ile sulh olup ben dahi sulh-ı mezbûru kabûl ve bedel-i sulh olan meblağ-ı mezbûr yüz elli riyâlî kuruşu mezbûr Mustafa Bey yedinden meclis-i sulhda tamâmen ahz u kabz eyledim dedikde, müteveffât-ı mezbûreye müte‘allika âmme-i da‘vâdan berî olup mezbûr Mustafa Bey’in zimmetini ibrâ-i âm ile ibrâ ve iskāt eyledim. Min ba‘d husûs-ı mezbûra müte‘allika mezbûr Mustafa Bey üzerine bi vechin mine’l-vücûh ve sebebin mine’l-esbâb da‘vâ ve hakkım kalmadı dedikde, mukırr-ı mezbûr Pîrî Halîfe’yi ikrâr-ı meşrûhunda el-mukarru lehü’l-mezbûr Mustafa Bey vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Mehmed Efendi b. Mehmed el-imâm, İbrahim Halîfe, Mustafa Çelebi b. Mehmed, Nuri Çelebi b. ( ), Bayram b. İvaz.