Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 63 Hüküm no: 30 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erzurum eski gümrük emini Bedros v. Sefer’in alacak hususunda Ömer Ağa b. Ali’nin zimmetini ibra ettiği Sâbıkan Erzurum Gümrük emîni olan Bedros v. Sefer nâm Ermeni meclis-i hatîr-i lâzımü’t-[tevkīrde], Mehmed Paşa’nın kapıcılar kethüdâsı olan fahrü’l-akrân Ömer Ağa b. Ali mahzarında bi’t-tav‘i’s-sâf ikrâr ve i‘tirâf edip merkūm Ömer Ağa zimmetinde karz-ı şer‘îden üç yüz kıt‘a riyâlî kuruş hakkım olup hâlâ meblağ-ı mezbûru merkūm Ömer Ağa yedinden tamâmen ahz u kabz edip merkūm Ömer Ağa zimmetinde bir akçe ve bir habbe hakkım bâkī kalmadığından gayrı târih-i kitâba gelince hukūk-ı ma‘lûme ve hukūk-ı mechûleye müte‘allika merkūm Ömer Ağa üzerine bi vechin mine’l-vücûh ve sebebin mine’l-esbâb da‘vâ nizâ‘ım ve hakkım yokdur dedikde, mezbûr Ömer Ağa dahi meclis-i mezbûrda merkūm Bedros muvâcehesinde tav‘an ikrâr ve i‘tirâf edip benim dahi mezbûr Bedros zimmetinde bundan akdem bin kıt‘a riyâlî kuruş hakkım var idi, ben dahi meblağ-ı mezbûr bin kıt‘a riyâlî kuruşu mezbûr Bedros yedinden tamâmen ahz u kabz eyledim, ba‘de’l-yevm merkūm Bedros üzerine bi vechin mine’l-vücûh ve sebebin mine’l-esbâb da‘vâ ve nizâ‘ım yokdur dedikde, mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Fahrü’l-a‘yân Ali Kethüdâ b. Lütfullah, Abdi Çelebi b. Mustafa et-tâcir, Musa Çelebi b. Mehmed, Bekçi? Hasan Bey [b.] el-Hâc İbrahim, Kürd Hasan Bey, Kör Hasan Bey, Uzun Hasan Bey, Hüseyin Bey tâbi‘-i Ali, Ali b. Rıdvan.