Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 64 Hüküm no: 31 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Mehmed’in menzil hissesini Mehmed Ağa b. Ahmed’e sattığı Mahmiye-i İstanbul hısnı ebvâbından Topkapısı kurbunda Yenikapı dâhilinde Hoca mahallesinde sâkine iken bundan akdem vefât eden Saraylı Selâmet Hâtun bt. Abdullah’ın verâseti, zevc-i metrûku Müteferrika Mehmed Ağa b. Ahmed’e ve sadriye kızı Ümmühâni’ye münhasıra olup ba‘dehâ mezbûre Ümmühâni dahi vefât edip verâseti babası mezbûr Mehmed’e münhasıra olup kable’l-kısme mezbûr Mustafa Çelebi dahi vefât edip verâseti mezbûr Memi Usta’nın li ebeveyn ammi oğlu olup Hersek Sancağı’nda Nevesin kazâsında Basilye nâm karyede sâkin Hasan b. Mehmed’e münhasıra olup tereke-i müteveffâ-yı evveli bi hasebi’l-münâsaha dört sehim i‘tibâr olunup sihâm-ı mezbûreden iki sehimi mezbûr Mehmed Ağa’ya ve iki sehimi mezbûr Hasan’a isâbet eylediği şer‘an mütehakkık oldukdan sonra mezbûr Hasan meclis-i şer‘-i şerîf-i lâzımü’t-teşrîfde, işbu râfi‘ül-kitâb mezbûr Mehmed Ağa mahzarında tav‘an ikrâr ve takrîr-i kelâm edip medîne-i Üsküdar’a tâbi‘-i İstavros nâm karyede bir tarafı merhûm Hünkâr İmâmı Yusuf Efendi veresesi mülklerine ve bir tarafı Yanaki kızı ( ) mülküne ve bir tarafı sâhil-i bahre ve bir tarafı tarîk-i âmma müntehî iki bâb fevkānî odayı ve altında ahûru ve beş kayıkhâneyi ve havlu ve kenîfi müştemil cemî‘ menzil müteveffâ-yı evveli mezbûre Selâmet Hâtun’un terekesinden olup minvâl-i meşrûh üzre cemî‘ menzil-i mezbûrun nısf-ı şâyi‘i oğlu mezbûr Mustafa Çelebi’den bana irs-i şer‘î ile isâbet [ve] intikāl eyleyip yedime ve taht-ı tasarrufuma dâhil olundukdan sonra cemî‘ menzil-i mezbûrda olan nısf hisse-i şer‘iyyemi kâffe-i hukūkuyla mezbûr Mehmed Ağa yüz yirmi altın tarafeynden îcâb ve kabûlü hâvî ve şürût-ı müfsideden ârî bey‘-i bât ile bey‘ ve teslîm edip ol dahi minvâl-i muharrer üzre nefsi için iştirâ ve tesellüm eyledikden sonra semen-i merkūm yüz yirmi altını merkūm Mehmed Ağa’nın yedinden tamâmen alıp kabz eyledim. Ba‘de’l-yevm menzil-i mezbûr âmme-i tevâbi‘ ve levâhıkı ve kâffe-i hukūk ve merâfıkı ile irsen ve şirâ’en merkūm Mehmed Ağa’nın mülkü ve hakkıdır, benim bi vechin mine’l-vücûh hakkım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Abdullah Efendi b. Mahmud el-imâm, İbrahim Çelebi b. Mahmud, Ahmed Efendi b. …?, İbrahim Çelebi b. Mehmed, İsmail Çelebi b. İbrahim, İbrahim b. Şahbaz, Mustafa Dede b. Abdullah, Süleyman Efendi b. ( ) el-imâm, Mustafa Halîfe Çelebi b. Mehmed er-râcil, Zülfikār Ağa b. Abdullah kapıcıbaşı-i sadr-ı a‘zam.