Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 65 Hüküm no: 32 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi ve Mustafa b. Mehmed’in menzil davasında Ayşe bt. Ali Çavuş’un zimmetini ibra ettikleri Kasaba-i Mudanya mahallâtından Eskicami mahallesinde sâkin Hasan Çelebi ve Mustafa ibney Mehmed meclis-i şer‘-i hatîr-i lâzımü’t-[tevkīrde], mahrûse-i Bursa’da Duhter-i Şerîf mahallesi sâkinelerinden işbu râfi‘atü’l-vesîka Ayşe Hâtun bt. Ali Çavuş mahzarında her biri bi’t-tav‘i’s-sâf ikrâr ve i‘tirâf edip merkūme Ayşe Hâtun’un taht-ı yedinde olup zikr olunan Duhter-i Şerîf mahallesinde vâki‘ bir tarafı Mustafa b. Abdullah ve Mansur b. Abdullah mülklerine ve bir tarafı Mehmed b. Eymir ve Boyacıoğlu Hüseyin dâmâd-ı Abdurrahman Efendi ve el-Hâc Hasan mülklerine ve bir tarafı Debbâğlar mahallesi imâmına mevkūf olan menzil ile el-Hâc Mustafa b. Abdullah mülklerine ve bir tarafı tarîk-i âmma müntehî olup Parmaksız evi demekle ma‘rûf menzil bizim hakkımızdır demekle, ma‘rûf menzil bizim hakkımızdır merkūme Ayşe Hâtun nâ-hak vaz‘-ı yed eylemişdir deyû bundan [akdem] da‘vâ eylemişdik, hâlâ da‘vâ-yı mezbûremizden berî olup husûs-ı mezbûra müte‘allika âmme-i da‘vâdan merkūme Ayşe Hâtun’u ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm ile iskāt eyledikde, ba‘de’l-yevm menzil-i mezbûra müte‘allika ve sâir hukūk-ı ma‘lûme ve hukūk-ı mechûleye müte‘allika merkūme Ayşe Hâtun üzerinde bi vechin mine’l-vücûh ve sebebin mine’l-esbâb da‘vâ ve nizâ‘ımız kalmadı dedikde, mukırrân-ı mezbûrânın ikrâr-ı meşrûhlarına el-mukarru lehâ’l-merkūme vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fî selh min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Muâlî Efendi b. Cafer Efendi, Süleyman Çelebi b. Muâlî Çelebi, Ali Çelebi b. Osman, Ramazan Efendi b. Şaban, Rıdvan Bey b. Abdullah, Mehmed Ağa, Ömer b. ( ), Mustafa b. ( ) gayruhüm.