Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 66 Hüküm no: 33 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülfettâh Ağa b. Mehmed’in idam edilen Varvar Ali Paşa’daki alacağının terekesinden tahsili Husûs-ı âti’l-beyânın mahallinde istimâ‘ı lâzım gelmekle, bi’[l]-iltimâs hâkim-i muvakki‘-i kitâb tûbâ-lehû ve hüsnü me’âb dahi mahmiye-i İstanbul’da Emin Nureddin mahallesinde hâlâ çavuşbaşı olan umdetü’l-emâcid ve’l-ekârim Abdülfettâh Ağa b. Mehmed’in çavuşbaşılık için ittihâz eylediği menziline varıp akd-i meclis-i şer‘-i şerîf eyledikde, mûmâ-ileyh Abdülfettâh Ağa meclis-i ma‘kūdda bundan akdem eyâlet-i Rum’dan ma‘zûl olup katl olunan Varvar Ali Paşa b. Behram’ın sulbî kebîr oğlu ve vârisi olup terekesine vaz‘-ı yed eyleyen umdetü’l-emâsil ve’l-a‘yân Mustafa Bey nâ[m] şâbb-ı âkil ve bâliğ mahzarında üzerine takrîr-i da‘vâ edip işbu Mustafa Bey’in babası ve mûrisi müteveffâ-yı mezbûr Var[var] Ali Paşa zimmetinde cihet-i karz-ı şer‘îden bin dört yüz riyâlî kuruş hakkım olup [kable’l-ahz merkūm vefât] etmekle zimmetinde kalmışdır, suâl olunup terekesinden alıverilmesin taleb ederim dedikde, gıbbe’s-suâl mûmâ-ileyh Mustafa Bey husûs-ı mezkûru inkâr edicek, müdde‘î-i mûmâ-ileyhden da‘vâ-yı meşrûhasını mübeyyine beyyine taleb olundukda, udûl-i ahrâr-ı ricâlden olup Dergâh-ı âlî kapıcıbaşılarından Hasan Ağa b. Abdullah ve mahmiye-i mezbûrede Ayasofya-i Kebîr mahallesinde sâkin Mehmed Efendi b. Osman nâm kimesne[ler] li ecli’ş-şehâde meclis-i ma‘kūda hâzırân olup gıbbe’l-istişhâd her biri şehâdet edip fi’l-hakīka işbu Mustafa Bey’in babası ve mûrisi Varvar Ali Paşa zimmetinde cihet-i karz-ı şer‘îden işbu Abdülfettâh Ağa’nın bin dört yüz riyâlî kuruş hakkı vardır, mezkûr Varvar Ali Paşa vefât edip zimmetinde kalmağla terekesinden edâsı vâcibdir, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle olundukdan sonra mûmâ-ileyh Abdülfettâh Ağa’ya meblağ-ı müdde‘â bin dört yüz riyâlî kuruşu müteveffâ-yı mezbûr Varvar Ali Paşa’dan hâl-i hayâtında asâleten veya vekâleten veya ba‘zan ahz u kabz eylemediğine veya âhara havâle olmadığına veya turuk-ı şer‘iyyeden bir tarîk ile müteveffâ-yı mezbûrun zimmetini ibrâ ve iskāt eylemediğine yemîn teklîf olundukda, ol dahi bi hasebi’l-mes’ûl yemîn billâhi’l-aliyyi’l-azîm edicek, şehâdet-i mezbûre mûcebince meblağ-ı müdde‘â bin dört yüz riyâlî kuruşu müdde‘î-i müşârun-ileyh Abdülfettâh Ağa’ya tereke-i müteveffâ-yı mezbûrdan edâ ve îfâya şerâyit-i hükm[-i şer‘î mer]‘iyye olduğu hâlde hükm-i şer‘î ile hükm olunup mâ vaka‘a bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Abdülganî Efendi b. Ömer, Halid Ağa b. Mustafa, Sefer Ağa b. Sefer, İsmail Efendi b. İbrahim, Osman Çavuş b. Mahmud.