Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 73 Hüküm no: 42 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andriye v. Kiga’nın Terzi Kostantin v. Mihal’de alacağı olduğu Mahmiye-i İstanbul’da vâki‘ merhûm Ferhad Paşa Hanı kurbunda sâkin işbu râfi‘ül-kitâb Andriye v. Kiga nâm zimmî meclis-i şer‘-i hatîr-i lâzımü’t-tevkīrde, mahmiye-i mezbûre hısnı ebvâbından Samadya Kapısı dâhilinde Zeytun mahallesinde sâkin Terzi Kostantin v. Mihal nâm zimmî muvâcehesinde üzerine takrîr-i da‘vâ edip işbu Kostantin’e bundan akdem dört bin fıddî akçe ikrâz ve teslîm eyledim, ol dahi iktirâz ve tesellüm ve mesârifine sarfla meblağ-ı mezbûr dört bin akçe zimmetinde hakkımdır. Hâlâ edâda ta‘annüd eder suâl olunup alıverilmesin taleb ederim dedikde, gıbbe’s-suâl mezbûr Kostantin fi’l-hakīka işbu müdde‘î Andriye’den vech-i muharrer üzre dört bin akçe iktirâz ve kabz ve mesârifine sarfla meblağ-ı müdde‘â-i merkūme zimmetimde lâzımü’l-edâ deynimdir deyû bi tav‘ihî ikrâr edicek, ikrârı mûcebince meblağ-ı mezbûrun müdde‘î-i mezbûra edâsına merkūm Kostantin üzerine ilzâm olunup mâ vaka‘a bi’t-taleb ketb olundu. Fi’l-yevmi’r-râbi‘ [min] şehri Rebî‘ilevvel li sene 1059. Şuhûdü’l-hâl: Bekir Beşe b. Musli, Ahmed Çelebi b. Abdurrahman, el-Hâc Mehmed b. Kasım.