Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 77 Hüküm no: 50 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi v. Kostantin’in ortağı Yekzelo v. Haroni’de olan alacağının vârisleri tarafından tahsil edildiği Vilâyet-i Rumeli’nde Kartine kazâsına tâbi‘ Akova nâm karyede Veziçe mahallesi ahâlîsinden olup mahmiye-i İstanbul’da Unkapanı’nda uncu dükkânında sâkin iken hâlik olan Yorgi v. Kostantin nâm zimmînin verâseti li ebeveyn er karındaşları Manoli ve Poğo’ya ve kız karındaşları Anasto ve Kando ve Trandafilo ve Riko ve İstano’ya ve vâlidesi Andriyani’ye münhasıra olduğu nakl-i şer‘î ile zâhir ve mütehakkık oldukdan sonra merkūm Poğo asâleten ve mezbûrûn Manoli ve Anasto ve Kando ve Trandafilo ve Riko ve İstano ve Andriyani taraflarından husûs-ı âti’l-beyâna vekîl olup ve kezâlik nakl-i şer‘î ile vekâleti sâbite olan Andon v. Panayot vekâleten meclis-i şer‘-i hatîr-i lâzımü’t-tevkīrde, hâlik-i mezbûrun şerîki işbu hâmilü’s-sifr Yekzelo v. Haroni nâm zimmî mahzarında her biri bi’l-asâle ve’l-vekâle ikrâr ve i‘tirâf edip mezbûr Yekzelo hâlik-i mezbûr Yorgi’nin terekesinden yetmiş bin fıddî râyic fi’l-vakt akçesini ve yüz aded un çuvalını ahz u kabz eylemişdi. Hâlâ meblağ-ı mezbûr yetmiş bin akçe ve zikr olunan yüz aded un çuvalını merkūm Yekzelo yedinden asâleten ve vekâleten tamâmen ahz u kabz eyledik, min ba‘d tereke-i hâlik-i mezbûrdan [bir akçe ve bir habbe hakkım bâkī kalmamışdır dedikde], merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sânî min Rebî‘ilâhir li sene tis‘a ve hamsîn ve elf. Şuhûdü’l-hâl: Receb Beşe b. Abdullah, Musa Efendi b. Ahmed, Ali Beşe b. Derviş, Hamza Beşe b. Hüseyin.