Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 79 Hüküm no: 52 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin terekesinin ebeveynine teslim edilmesi Eyâlet-i Rum’da Kazova kazâsına tâbi‘ Dekseciköyü? nâm karyede Mahmud b. Bektaş kendi tarafından asâleten ve zevcesi Ayşe bt. ( ) nâm hâtun tarafından husûs-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite oldukdan sonra vekâleten meclis-i şer‘-i şerîfde, mahmiye-i İstanbul’da bi’l-fi‘l yeniçeri beytülmâlı emîni olup Altmışıncı Solaklar Odası’nda vefât eden Mehmed Beşe nâm râcilin zâhirde vâris-i ma‘rûfu olmamak zu‘mu ile terekesine vâzı‘u’l-yed olduğu şer‘an sâbit olan İlyas Ağa b. Sinan tarafından vech-i âtî üzre husûmete vekîl olup vekâleti bi mâ hüve nehcü’s-sübût şer‘an sâbite olan Mehmed Beşe b. Mustafa mahzarında üzerine bi’l-asâle ve bi’l-vekâle takrîr-i da‘vâ edip zikr olunan Solaklar Odası’nda vefât eden mezbûr Mehmed Beşe benim sulbî oğlumdur, verâseti bana ve vâlidesi müvekkilem ve zevcem mezbûre Ayşe Hâtun’a münhasıradır cemî‘ terekesi bize isâbet eylemişdir. Hâlâ vekîl-i mezbûr Mehmed Beşe’ye suâl olunup tereke-i müteveffâ-yı mezbûre Mehmed Beşe’den müvekkili İlyas Ağa’nın yedi izâle olunması matlûbumdur dedikde, gıbbe’s-suâl mezbûr Mehmed Beşe müteveffâ-yı mezbûrun terekesine müvekkili emîn-i mezbûr vaz‘-ı yed eylediğini ikrâr edip lâkin mezbûrât Mehmed ve Ayşe ve Ayşe Hâtun’un verâsetlerini inkâr edicek, müdde‘î-i mezbûr Mahmud’dan müdde‘âsını mübeyyine beyyine taleb olundukda, udûl-i ahrâr-ı ricâl-i müslimînden olup kazâ-i mezbûra tâbi‘ Reisköyü nâm karyeden Osman Fakīh b. el-Hâc Abdurrahman ve Ezinepazarı nâm karyeden Mustafa Bey b. Hamza nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd her biri şehâdet edip fi’l-hakīka mahmiye-i İstanbul’da Altmışıncı Solaklar Odası’nda vefât eden Mehmed Beşe nâm râcil işbu müdde‘î Mahmud babasıdır ve müvekkilesi Ayşe bt. ( ) nâm hâtun vâlidesidir, müteveffâ-yı mezbûrun verâseti mezbûrân Mahmud ve Ayşe’ye münhasıradır mezbûrân Mahmud ve Ayşe Hâtun’dan gayrı vârisi ve terekesine âhar müstahık olduğu ma‘lûmumuz değildir, biz bu husûsa bu vech üzre şâhidleriz, şehâdet dahi ederiz deyû her biri münkir-i merkūm muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle olmağın, şehâdet-i merkūme mûcebince mezbûrân Mahmud ve Ayşe Hâtun’un verâsetine ve emîn-i merkūm İlyas Ağa’nın tereke-i müteveffâ-yı mezbûreden kasr-ı yedine vekîli mezbûr Mehmed Beşe mahzarında hükm olunup mâ vaka‘a bi’t-taleb ketb olundu. Fî gurreti şehri Rebî‘ilevvel li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülbâkī, Osman b. Mehmed, İbrahim Çelebi b. Şaban, Yahya Bey [b.] Zekeriya.