Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 80 Hüküm no: 53 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Efendi b. Cafer’in mülk menzilini Hüseyin Çelebi b. Hasan’a sattığı Mahmiye-i İstanbul’da Çoban Çavuş mahallesinde sâkin İsmail Efendi b. Cafer meclis-i şer‘-i hatîrde, işbu râfi‘ül-kitâb Hüseyin Çelebi b. Hasan mahzarında bi’t-tav‘i’s-sâf ikrâr ve i‘tirâf edip zikri âtî akdin sudûruna değin silk-i mülk ve yedimde münselik hakkım olup mahalle-i mezbûrede vâki‘ bir tarafı yine kendi mülküme ve bir tarafı Hasan Ağa odalarına ve bir tarafı ba‘zan Hatice Hâtun bt. Hüsrev mülküne ve ba‘zan Mehmed Efendi mülküne ve bir tarafı tarîk-i âmma müntehî olup iki bâb fevkānî ve iki bâb tahtânî odaları ve ahûru ve matbahı ve zât-ı eşcâr-ı müsmire hadîkayı ve havluyu ve kenîfi müştemil cemî‘ mülk menzilimi, cemî‘ tevâbi‘ ve levâhıkı ve kâffe-i hukūk ve merâfıkı ile mezbûr Hüseyin Çelebi’ye bin dört yüz kıt‘a riyâlî kuruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm eyledikden sonra semen-i mezbûr bin dört yüz riyâlî kuruşu mezbûr Hüseyin Çelebi yedinden tamâmen ahz u kabz eyledim. Ba‘de’t-teveccüh menzil-i mahdûd-ı mezbûr merkūm Hüseyin Çelebi’nin mülk-i müşterâsı ve hakk-ı sırfı olmuşdur dedikde, mukırr-ı mezbûru ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fî selhi şehri Rebî‘ilevvel li sene 1059. Şuhûdü’l-hâl: Umdetü’l-emâcid ve’l-ekârim Hasan Ağa b. Hüseyin Paşa ağa-yı İstanbul, Fahrü’l-akrân Ali Ağa el-cündî, Musli Ağa b. Süleyman Ağa, Musa Efendi el-imâm, Halil Halîfe el-müezzin, Mustafa Bey el-bevvâbü’s-Sultânî, Abdurrahman Efendi, Süleyman Bey b. Abdülmennân, Mehmed Efendi el-müderris.